இந்த நிலையில் மாநகராட்சி அதிகாரிகள் எந்த வித முன் அறிவிப்பும் இல்லாமல் பூ மார்க்கெட்டில் உள்ள தண்ணீர் தொட்டி வைக்கப்பட்டுள்ள மேடை மற்றும் கடைகளின் முன் போடப்பட்டிருந்த தகர சீட்டுகளை பொக்லைன் எந்திரம் மூலம் இடித்தனர். இதை பார்த்து அதிர்ச்சி அடைந்த வியாபாரிகள் அதிகாரிகளுடன் வாக்குவாதத்தில் ஈடுபட்டு, இடிப்பதை தடுத்து நிறுத்தினர். பின்னர் அவர்கள் அனைவரும் கடைகளில் பூ வியாபாரத்தை நிறுத்தி விட்டு, ஒன்றாக திரண்டு வந்து பூ மார்க்கெட் அருகே காமராஜர் ரோட்டில் சாலைமறியலில் ஈடுபட்டனர். இதனால் கடும் போக்குவரத்து நெரிசல் ஏற்பட்டது.

இதுகுறித்த தகவல் அறிந்து அங்கு வந்த தெற்கு போலீசார் சாலைமறியலில் ஈடுபட்டிருந்தவர்களுடன் பேச்சுவார்த்தை நடத்தினர். அவர்கள் மறியலை கைவிட மறுத்ததால் அனைவரையும் கைது செய்வதாக கூறி பஸ்சில் ஏற்றினார்கள். 20-க்கும் மேற்பட்ட வியாபாரிகள் பஸ்சில் ஏறிய நிலையில் அங்கு வந்த அரசியல் கட்சி நிர்வாகிகள், பேச்சுவார்த்தை மூலம் பிரச்சினையை பேசி தீர்த்துக்கொள்ளலாம். எனவே கைது நடவடிக்கையை கைவிட வேண்டும் என்று கூறி பஸ்சில் ஏறி இருந்தவர்களை இறங்க வைத்தனர்.

அதைத்தொடர்ந்து அங்கு வந்த மாநகராட்சி உதவி ஆணையர் சபியுல்லா, அரசியல் கட்சியினர் மற்றும் வியாபாரிகளுடன் பேச்சுவார்த்தை நடத்தினார். அப்போது, கடந்த 20 நாட்களுக்கும் மேலாக பூட்டி வைத்துள்ள கழிப்பறையை திறந்து விட வேண்டும். சுப்பராயன் எம்.பி.யிடம் அதிகாரிகள் கூறியபடி வருகிற 20-ந்தேதி வரை கடைகளை இடிக்க கூடாது. தற்போது இங்கு கடை வைத்துள்ள அனைத்து வியாபாரிகளுக்கும் டோக்கன் கொடுக்க வேண்டும் என்று வியாபாரிகள் தெரிவித்தனர்.

அப்போது பேசிய உதவி ஆணையர் சபியுல்லா, கழிப்பறையை உடனடியாக திறக்க ஏற்பாடு செய்கிறேன். மற்ற கோரிக்கைகளை ஆணையாளரிடம் தெரிவிக்கிறேன் என்றார். இதனால் சமாதானம் அடைந்த வியாபாரிகள் அங்கிருந்து கலைந்து சென்றனர். இதனால் சுமார் ஒரு மணி நேரம் நடைபெற்ற பரபரப்பு முடிவுக்கு வந்தது.