சென்னையில் கொரோனா தொற்றால் போலீசார் பலரும் பாதிக்கப்பட்டு வருகின்றனர். சென்னை மாநகர போலீஸ் துறையில் உதவி கமிஷனர் உள்பட 11 பேர் கொரோனா பாதிப்பால் உயிரிழந்து உள்ளனர். இந்தநிலையில் கொரோனாவுக்கு மேலும் 2 போலீஸ் சப்-இன்ஸ்பெக்டர்கள் பலியாகி உள்ளனர். சென்னை வேப்பேரி போக்குவரத்து போலீஸ் நிலையத்தில் சிறப்பு சப்-இன்ஸ்பெக்டராக பணியாற்றி வந்தவர் இளங்கோவன் (வயது 55). இவர் கடந்த ஏப்ரல் 17-ந்தேதி கோவேக்சின் தடுப்பூசி செலுத்திக்கொண்டார். எனினும் அவர், கொரோனா தொற்றால் பாதிக்கப்பட்டு கடந்த மாதம் 28-ந்தேதி முதல் சென்னை ஓமந்தூரார் அரசு ஆஸ்பத்திரியில் சிகிச்சை பெற்று வந்தார். ஆனால் அங்கு சிகிச்சை பலனின்றி நேற்று மதியம் அவரது உயிர் பிரிந்தது.

இளங்கோவனுக்கு பாரதி (40) என்ற மனைவியும், மது (22), சுவீட்டி (19) ஆகிய 2 மகள்களும், சர்வேஷ் (4) என்ற மகனும் உள்ளனர். சென்னை வேப்பேரி போக்குவரத்து போலீஸ்நிலையத்தில் இன்ஸ்பெக்டர் உள்பட மேலும் 11 போலீசார் கொரோனா தொற்றால் பாதிக்கப்பட்டு சிகிச்சை பெற்று வருகின்றனர்.