நீலகிரி மாவட்டத்தின் பால் உற்பத்தியில் மசினகுடி பகுதி முக்கிய பங்கு வகித்து வருகிறது. மசினகுடி, மாயார், வாழைத்தோட்டம், மாவனல்லா, ஆனைக்கட்டி, சிறியூர், சொக்கநள்ளி, பொக்காபுரம் உள்ளிட்ட கிராமங்களில் மாடுகள், எருமைகள், ஆடுகள் உள்ளிட்ட கால்நடைகளை வைத்து பராமரிக்கபட்டு வருகின்றன. இந்த கால்நடைகள் மூலம் கிடைக்கும் பால் மற்றும் சாணம் போன்றவற்றை விற்பனை செய்து அதன் மூலம் கிடைக்கும் வருமானத்தின் மூலம் இப்பகுதி மக்கள் வாழ்க்கை நடத்தி வருகின்றனர்.

இந்த நிலையில் கடந்த 2 ஆண்டுகளுக்கு முன்பு ஏற்பட்ட வரலாறு காணாத வறட்சியால் சுமார் 2 ஆயிரம் கால்நடைகள் உயிரிழந்தன. இதனால் விவசாயிகள் கடுமையாக பாதிக்கப்பட்டனர். இதனையடுத்து கால்நடையை வாழ்வாதாரமாக கொண்ட விவசாயிகளுக்கு கறவை மாடு வழங்க மாவட்ட நிர்வாகம் நடவடிக்கை எடுத்துள்ளது. கூட்டுறவு சங்கத்தின் மூலம் அதற்கான கடன் வழங்கப்படுகிறது.