நேற்று ஒரு நாளில் கொரோனா தாக்குதலுக்கு புதிதாக ஆளானோர் எண்ணிக்கையை விட குணம் அடைந்தோர் எண்ணிக்கை கூடுதலாக உள்ளது. நேற்று நாடு முழுவதும் கொரோனாவின் கோரப்பிடியில் இருந்து விடுபட்டோர் எண்ணிக்கை 14 ஆயிரத்து 16 ஆகும். அவர்களில் கேரளாவில் அதிகபட்சமாக 5,959 பேர் கொரோனாவில் இருந்து மீண்டுள்ளனர். அதற்கு அடுத்த நிலையில் மராட்டிய மாநிலத்தில் 3,423 பேர் கொரோனாவில் இருந்து நலம் பெற்றுள்ளனர். கெரோனாவில் இருந்து இதுவரை நாட்டில் 1 கோடியே 5 லட்சத்து 48 ஆயிரத்து 521 பேர் குணம் அடைந்து இருக்கிறார்கள். உலகிலேயே கொரோனாவில் இருந்து மீட்கப்பட்டவர்கள் எண்ணிக்கையில் இந்தியா முதல் இடத்தில் தொடர்கிறது. கொரோனா மீட்பு விகிதம் என்பது 97.25 சதவீதமாக அதிகரித்துள்ளது.

பலி குறைகிறது

இந்தியாவில் கொரோனாவால் ஏற்படுகிற உயிர்ப்பலிகளின் அளவு தொடர்ந்து குறைந்து வருவது நிம்மதிப்பெருமூச்சுவிட வைக்கிறது. நேற்று கொரோனாவால் 78 பேர் மட்டுமே இறந்துள்ளனர். தொடர்ந்து 4-வது நாளாக பலி 100-க்குள் அடங்கி இருப்பது முக்கியத்துவம் பெறுகிறது. நேற்று பலியானவர்களில் 16 பேர் கேரளாவை சேர்ந்தவர்கள் ஆவார்கள். 15 பேர் மராட்டிய மாநிலத்திலும், 11 பேர் பஞ்சாப் மாநிலத்திலும் பலியாகி இருக்கிறார்கள்.

இதுவரை நாட்டில் 1 லட்சத்து 55 ஆயிரத்து 158 பேர் கொரோனாவுக்கு பலியாகி இருக்கிறார்கள். பலியானோர் எண்ணிக்கையில் மராட்டிய மாநிலம், தொடர்ந்து முதல் இடத்தை வகித்து வருகிறது. அங்கு 51 ஆயிரத்து 325 பேர் கொரோனாவால் உயிரிழந்திருக்கிறார்கள். இரண்டாவது இடத்தில் தமிழ்நாடு தொடர்கிறது. மூன்றாமிடத்தை 12 ஆயிரத்து 239 பேரை இழந்துள்ள கர்நாடகம் வகிக்கிறது. இந்தியாவில் கொரோனா இறப்புவிகிதம் 1.43 சதவீதமாக உள்ளது.

சிகிச்சை பெறுவோரும் குறைவு

இந்தியாவில் கொரோனாவில் இருந்து மீள்வதற்காக சிகிச்சை பெறுவோர் எண்ணிக்கையும் தொடர்ந்து குறைந்து வருகிறது. நேற்றைய நிலவரப்படி தொடர் சிகிச்சையில் இருப்போர் எண்ணிக்கை 1 லட்சத்து 43 ஆயிரத்து 623 ஆக உள்ளது. இது மொத்த பாதிப்பில் 1.32 சதவீதம் ஆகும்.

இந்தியாவில் சிகிச்சை பெறுவோர் எண்ணிக்கை தொடர்ந்து 2 லட்சத்துக்குள் இருப்பது குறிப்பிடத்தக்கது.