வால்மீகி திருவிழாவையொட்டி தாவணகெரேயில் நேற்று வால்மீகி மக்கள் பங்கேற்ற மாநாடு நடைபெற்றது. இதில் முதல்-மந்திரி எடியூரப்பா கலந்து கொண்டார். இந்த மாநாட்டில் வால்மீகி குரு பீட மடாதிபதி பிரசன்னானந்தபுரி சுவாமி பேசும்போது, "வால்மீகி சமூகத்திற்கான இட ஒதுக்கீட்டை அதிகரிக்க வேண்டும் என்று நாங்கள் நீண்ட காலமாக போராடி வருகிறோம். இந்த கோரிக்கையை நிறைவேற்றாவிட்டால் வருகிற மார்ச் 9-ந் தேதி முதல் இதே இடத்தில் சாகும்வரை உண்ணாவிரதம் இருக்க நான் முடிவு செய்துள்ளேன். அப்போது ஒருவேளை நான் செத்தால், அதற்கு நீங்கள், நீங்கள்" என்று பேச்சை இழுத்தார்.

அப்போது உடனே அடுத்த இருக்கையில் அமர்ந்திருந்த எடியூரப்பா குறுக்கிட்டு, "நான் இன்னும் பேசவே இல்லை. நான் என்ன பேசுகிறேன் என்பதை கவனியுங்கள். அதன் பிறகு மற்ற விஷயங்களை பேசுங்கள். அதற்கு முன்பாக இவ்வாறு பேசுவது சரியல்ல" என்று கோபத்துடன் கூறினார்.