சுட்டெரிக்கும் வெயில் காரணமாக இந்தியாவில் கோதுமை உற்பத்தி பாதிக்கப்படும் என்ற அச்சம் ஏற்பட்டு உள்ளது. அத்துடன் உக்ரைன் போர் போன்ற சர்வதேச சிக்கல்களாலும் கோதுமை வர்த்தகத்தில் பாதிப்பு ஏற்பட்டு உள்ளது. இதைத்தொடர்ந்து இந்தியாவில் கோதுமை ஏற்றுமதிக்கு மத்திய அரசு கடந்த மே மாதம் தடை விதித்தது. இது சர்வதேச அளவில் சலசலப்புகளையும் ஏற்படுத்தி இருந்தது.

இந்த நிலையில் கோதுமை மாவு, ரவை, மைதா போன்ற கோதுமை சார்ந்த பொருட்களுக்கும் மத்திய அரசு தற்போது கட்டுப்பாடுகளை விதித்து இருக்கிறது. உள்நாட்டில் விலை உயர்வை தடுக்கும் நோக்கில் இந்த நடவடிக்கை எடுக்கப்பட்டு உள்ளது. அந்தவகையில் இனிமேல் கோதுமை ஏற்றுமதிக்கு அமைச்சக குழுவின் ஒப்புதல் பெற வேண்டும். இது வருகிற 12-ந்தேதி முதல் அமலாகிறது.