நாசிக் மாவட்டம் மாலேகாவில் கடந்த 2008ம் ஆண்டு செப்டம்பரில் குண்டுவெடிப்பு சம்பவம் நடைபெற்றது. இதில், 6 பேர் பலியானார்கள். சுமார் 100 பேர் படுகாயம் அடைந்தனர். இந்த சம்பவத்துக்கு மூளையாக செயல்பட்டதாக பெண் சாமியார் சாத்வி பிரக்யா தாக்குர் மற்றும் முன்னாள் லெப்டிணன்ட் ஜெனரல் பிரசாத் புரோகித் உள்ளிட்டோரை தீவிரவாத தடுப்பு படையினர் கைது செய்து சிறையில் அடைத்தனர்.

இந்த நிலையில், 44 வயது சாத்வி பிரக்யா தாக்குரும், பிரசாத் புரோகித்தும் ஜாமீன் கோரி மும்பை ஐகோர்ட்டில் மனு தாக்கல் செய்திருந்தனர். இந்த மனு நீதிபதிகள் ரஞ்சித் மோரே மற்றும் ஷாலினி பன்சால்கர் ஜோஷி ஆகியோர் முன்பு 25-ம் தேதி விசாரணைக்கு வந்தது. வழக்கை விசாரித்த நீதிபதிகள், பெண் சாமியார் சாத்வி பிரக்யா தாக்குரை ரூ.5 லட்சம் சொந்த ஜாமீனில் விடுவித்தனர். மேலும், அவர் தன்னுடைய பாஸ்போர்ட்டை தேசிய புலனாய்வு முகமை அதிகாரிகளிடம் ஒப்படைக்க வேண்டும் என்றும், தேவைப்படும் போது அவர்கள் முன்பு விசாரணைக்காக ஆஜராக வேண்டும் என்றும் அறிவுறுத்தினர்.