சென்னை,
தமிழக மக்களின் நலனுக்காக முதல்-அமைச்சர் மு.க.ஸ்டாலின் துபாய் செல்லவில்லை; தனிப்பட்ட காரணங்களுக்காகவே துபாய் சென்றுள்ளார் என எதிர்க்கட்சி தலைவர் பழனிசாமி குற்றம் சாட்டியுள்ளார்.
இந்த நிலையில், துபாய் பயணம் குறித்து எடப்பாடி பழனிசாமியின் குற்றச்சாட்டுக்கு தொழில்துறை அமைச்சர் தங்கம் தென்னரசு பதில் அளித்துள்ளார்.
அவர் கூறியதாவது:-
துபாய் பயண நேரத்தில், விமானம் இல்லா சூழலால் தனி விமானத்தில் முதல்-அமைச்சர் மு.க.ஸ்டாலின் பயணம் மேற்கொண்டார். அதற்கான செலவை திமுகவே ஏற்றுக்கொண்டிருக்கிறது. தனி விமானத்தின் செலவு அரசு உடையது அல்ல, திமுகவின் செலவு தான்.
முதல்-அமைச்சரின் துபாய் பயணம் முதலீடுகளை ஈர்ப்பதற்கான பயணம் மட்டுமல்ல, அயலக தமிழ் சமூகத்தின் வளர்ச்சிக்கான பயணம் ஆகும். உலக கண்காட்சி நிறைவுபெற சிறிது நாட்கள் இருக்கும் போது மக்கள் கூட்டம் அதிகமாக இருக்கிறது.
எடப்பாடி பழனிசாமி முதல்-அமைச்சராக இருந்தபோது சட்டம்-ஒழுங்கு எப்படி இருந்தது என்று மக்களுக்கு நன்றாக தெரியும்.
இவ்வாறு அவர் கூறினார்.