கட்டுமான பணிகள் நடைபெறும் பகுதிகளில் இருந்து கொண்டு வரப்படக்கூடிய கட்டிட கழிவுகள் கூவம் ஆற்றங்கரையோரம் கொட்டி செல்கிறார்கள். இது தொடர்கதையாகவே நடந்து கொண்டிருக்கிறது. என்னதான் கூவம் நதி சீரமைப்பு, சுற்றுசூழல் மறுசீரமைப்பு என திட்டங்கள் முன்னெடுக்கப்பட்டாலும், இதுபோன்ற நடவடிக்கைகளால் கூவம் நதி இன்னும் மாசுபட்டு கொண்டிருக்கிறது என்பதே உண்மையாக உள்ளது.கனரக வாகனங்களில் கட்டிட கழிவுகள் அடிக்கடி இங்கே கொட்டப்பட்டு வருகின்றன. அதேபோல சேறு, சகதி நிறைந்த கலவையும் அதிகளவில் ஆற்றங்கரையோரம் கொட்டப்படுகிறது. இந்த சேறு கலவை கூவம் நதி நீரோட்டத்தில் கலந்து வருகிறது. இந்த சேறு கலவை நதி நீரோட்டத்தை பாதித்து, திட்டு திட்டாக படிந்திருக்கின்றன. மழைக்காலங்களின் போது வெள்ள நீர் பாய்ந்தோடி செல்வதற்கு நிச்சயம் இது பாதிப்பை ஏற்படுத்தத்தான் போகிறது.

பருவமழை தொடங்கும் முன்பாக...

லாரிகள் மூலம் கொட்டப்பட்டு வரும் கட்டிட கழிவுகள் சூழ்ந்திருப்பதால், கோல்டன் ஜார்ஜ் நகர் - நெற்குன்றம் பகுதிகளை இணைக்கும் பாலம் உள்ள பகுதி முன்பைவிட சுருங்கிவிட்டது என்றே சொல்லலாம். அந்தளவு கட்டிட கழிவுகளே ஆக்கிரமித்திருக்கின்றன.நீர்நிலை மாசுபாட்டை தடுக்க கூவம் ஆற்றங்கரையோரம் மரக்கன்றுகள் நடுவதற்காக நிதி திரட்ட திட்டமிட்டிருந்தோம். ஆனால் இதுபோன்ற கட்டிட கழிவுகள் சூழ்ந்திருக்கும் நிலையில் இந்த திட்டத்தை எங்கே போய் செயல்படுத்துவது? எனவே பருவமழைக்காலம் தொடங்கும் முன்பாக இந்த கட்டிட கழிவுகளை அகற்றிட வேண்டும்.

இவ்வாறு அவர்கள் கூறினர்.

பொதுமக்களின் எதிர்பார்ப்பு

தி.மு.க. அரசு அமைந்ததில் இருந்து மக்கள் நல பணிகளிலும், குறைகள்-புகார்கள் உடனுக்குடன் தீர்ப்பதிலும் அதிகாரிகள் முனைப்புடன் பணியாற்றிட வேண்டும் என முதல்-அமைச்சர் மு.க.ஸ்டாலின் அடிக்கடி வலியுறுத்தி வருகிறார்.அந்தவகையில் மக்களின் கோரிக்கைகளை ஏற்கும் வகையிலும், மழைக்கால முன் எச்சரிக்கை நடவடிக்கையாகவும் உரிய நடவடிக்கைகளை சம்பந்தப்பட்ட துறை அதிகாரிகள் உடனடியாக கையாள வேண்டும் என்பதே பொதுமக்களின் எதிர்பார்ப்பாக இருக்கிறது.