கடந்த மாதம் 30-ந் தேதி ரெயில்வே பாதுகாப்பு அதிகாரிகள், பொதுமக்களிடம் கருத்துகளை கேட்டறிந்தனர். அப்போதும் இதே கோரிக்கையை வலியுறுத்திய பொதுமக்கள், பழவந்தாங்கல் ரெயில் நிலையத்தில் 4-வது நடைமேடை வழியாக தென்மாவட்டங்களுக்கு எக்ஸ்பிரஸ் ரெயில்கள் செல்லும்போது இடையூறாக உள்ள தடுப்பு சுவர்களையும் அகற்றும்படி கோரிக்கை விடுத்தனர்.

இதையடுத்து 6-ந் தேதி பழவந்தாங்கல் ரெயில் நிலையத்தில் ஆய்வு மேற்கொண்ட ரெயில்வே பாதுகாப்பு அதிகாரிகள் மற்றும் ரெயில்வே போலீசார், 4-வது நடைமேடையில் இடையூறாக இருந்த தடுப்பு சுவரை சுமார் 30 அடி நீளத்துக்கு இடித்து அகற்றினர்.

பணிகள் தொடக்கம்

ஆனால் அடுத்தடுத்து 2 நாட்களில் 7 உயிர்களை பலி வாங்கிய பரங்கிமலை ரெயில் நிலையத்தில் 4-வது நடைமேடையில் உள்ள தடுப்பு சுவரை அகற்றுவது சாத்தியம் இல்லை என அதிகாரிகள் தெரிவித்தனர். அதற்கு பதிலாக தண்டவாளம் அருகே நடைமேடையின் முன்புறம் உள்ள சுவரை அகற்றி, 4-வது தண்டவாளத்தை சில அடி தூரம் தள்ளி அமைத்தால் விபத்துகளை தவிர்க்கலாம் என அதிகாரிகள் முடிவு செய்தனர்.

இதற்காக 4-வது தண்டவாளத்தில் நடைமேடை ஓரம் உள்ள ஜல்லிக்கற்கள் அகற்றப்பட்டன. தண்டவாளத்தை மாற்றி அமைக்கும் வகையில் நடைமேடையின் முன்புறம் உள்ள சுவரை அகற்றும் பணியை ரெயில்வே ஊழியர்கள் தொடங்கினர். விரைவில் இந்த பணிகள் முடிந்து 4-வது நடைமேடையில் ரெயில் போக்குவரத்து நடக்கும் என அதிகாரிகள் தெரிவித்தனர்.