தென் ஆப்பிரிக்காவில் கடந்த 2009-ம் ஆண்டு முதல் 2018-ம் ஆண்டு வரை தொடர்ந்து 9 ஆண்டுகள் அதிபராக இருந்தவர் ஜேக்கப் ஜூமா. இவர் தனது 9 ஆண்டு கால பதவி காலத்தில் தன்னுடைய அதிகாரத்தை தவறாக பயன்படுத்தி எண்ணிலடங்கா அரசு சொத்துக்களை கொள்ளையடித்ததாக குற்றச்சாட்டுகள் எழுந்தன.இந்த ஊழல் குற்றச்சாட்டுகளின் எதிரொலியாக கடந்த 2018-ம் ஆண்டு பிப்ரவரி மாதம் ஜேக்கப் ஜூமா அதிபர் பதவியை ராஜினாமா செய்தார்.துணை அதிபராக இருந்து வந்த சிரில் ராமபோசா அதிபராக பதவி ஏற்றார். அதனை தொடர்ந்து சிரில் ராமபோசா தலைமையிலான அரசு முன்னாள் அதிபர் ஜேக்கப் ஜூமா மீதான ஊழல் குற்றச்சாட்டுகள் தொடர்பாக அவர் மீது பல்வேறு வழக்குகளை பதிவு செய்தது.

இந்த ஊழல் வழக்குகள் மீது அந்த நாட்டு சுப்ரீம் கோர்ட்டு கடந்த ஆண்டு விசாரணையை தொடங்கியது. இதில் ஒரே ஒரு முறை மட்டும் விசாரணைக்கு நேரில் ஆஜரான ஜேக்கப் ஜூமா, அதன்பிறகு சுப்ரீம் கோர்ட்டு பலமுறை சம்மன் அனுப்பியும் விசாரணைக்கு நேரில் ஆஜராகவில்லை. இதனை தொடர்ந்து அவர் மீது கோர்ட்டு அவமதிப்பு வழக்கு தொடரப்பட்டது.இந்த வழக்கை விசாரித்த சுப்ரீம் கோர்ட்டு நீதிபதிகள் கோர்ட்டை அவமதித்த குற்றத்துக்காக ஜேக்கப் ஜூமாவுக்கு 15 மாதம் சிறை தண்டனை விதித்து கடந்த மாதம் 29-ந் தேதி தீர்ப்பு வழங்கினார்.ஜூலை 4-ந் தேதிக்குள் அவர் போலீசில் சரணடையவில்லை என்றால் அவரை கைது செய்து சிறையில் அடைக்க வேண்டும் எனவும் நீதிபதிகள் உத்தரவிட்டனர்.இதனிடையே இந்த தீர்ப்பு வெளியானது முதலே ஜேக்கப் ஜூமாவின் ஆதரவாளர்கள் அவரது சிறை தண்டனைக்கு எதிர்ப்பு தெரிவித்து போராட்டத்தில் ஈடுபட்டு வந்தனர்.