இந்த வழக்கில் அரசு தரப்பில் சிறப்பு வக்கீலாக பாகிஸ்தான் கூட்டு விசாரணை முகமையை சேர்ந்த சவுதாரி அசார் நியமிக்கப்பட்டு இருந்தார். தொடக்கம் முதலே இந்த வழக்கில் அவர்தான் ஆஜராகி வந்தார். இந்த நிலையில் பாகிஸ்தான் உள்துறை அமைச்சகம் சவுதாரி அசாரை மும்பை தாக்குதல் வழக்கில் இருந்து அதிரடியாக நீக்கி உள்ளது. அவருடைய பணி இந்த வழக்கில் இனி தேவையில்லை என்றும், அவர் அரசு வழிமுறைப்படி இந்த வழக்கை கையாளவில்லை என்றும் இதற்கு உள்துறை அமைச்சகம் காரணம் கூறி உள்ளது. அதேநேரம் பெனாசிர் பூட்டோ படுகொலை வழக்கில் அவர் தொடர்ந்து அரசு தரப்பு வக்கீலாக நீடிப்பார் எனவும் அறிவிக்கப்பட்டு உள்ளது. சவுதாரி அசார் நீக்கம் இந்தியாவிற்கு பெரும் பின்னடைவாக பார்க்கப்படுகிறது.

தலைமை வழக்கறிஞராக செயல்பட்ட சவுதாரி அசார் மற்றும் பாகிஸ்தான் அரசுக்கு இடையே வழக்கை கையாளுவதில் வேறுபாடு நிலவியது காரணமாகவே அவர் நீக்கப்பட்டு உள்ளார் என தகவல்கள் தெரிவிக்கிறது. மும்பை தாக்குதல் வழக்கில் பாகிஸ்தான் சிறப்பு கவனத்தை செலுத்துகிறது. சவுதாரி அசார் இவ்விவகாரத்தில் அரசின் வழிமுறையின்படி செயல்படாமல் இருந்து இருக்கலாம். சட்டத்தின்படியே அவர் முக்கிய வழக்குகளில் செயல்பட்டு உள்ளார், என்று அதிகாரிகள் தரப்பில் விளக்கப்பட்டு உள்ளது. இதுதொடர்பாக பிடிஐ செய்தி நிறுவனம் அசாரை நாடிய போது, மும்பை தாக்குதல் வழக்கை விசாரிப்பதை நிறுத்திக்கொள்ளுமாறு கேட்டுக்கொள்ளப்பட்டதாக குறிப்பிட்டு உள்ளார். இவ்வழக்கு விசாரணையில் இனிநான் இடம்பெற மாட்டேன் என கூறிஉள்ளார். இம்முடிவு தொடர்பாக பாகிஸ்தான் அரசு எந்தஒரு விளக்கமும் கொடுக்கவில்லை எனவும், இது வழக்கமான நடைமுறை எனவும் அதிகாரிகள் தரப்பில் தெரிவிக்கப்படுகிறது.