இந்தியாவுக்கும்-இலங்கைக்கும் இடையே உள்ள கச்சத்தீவில் அந்தோணியார் ஆலயம் அமைந்துள்ளது. கடந்த 3 ஆண்டுகளுக்கு முன்பு இலங்கை அரசால் கச்சத்தீவில் புதிதாக அந்தோணியார் ஆலயம் கட்டப்பட்டு அதில் திருவிழாவும் நடைபெற்று வருகிறது.

இந்த ஆண்டுக்கான கச்சத்தீவு அந்தோணியார் ஆலய திருவிழா இன்று (வெள்ளிக்கிழமை) தொடங்கி 2 நாட்கள் நடக்கிறது. நாளை மாலை 5 மணி அளவில் ஆலயம் முன்புள்ள கொடிமரத்தில் நெடுந்தீவு பங்குத்தந்தை பத்திநாதன் மற்றும் ராமேசுவரம் வேர்க்கோடு பங்குத்தந்தை அசோக் வினோ ஆகியோர் அந்தோணியாரின் திரு உருவம் பதித்த கொடியை ஏற்றுகின்றனர். தொடர்ந்து ஆலயத்தைச் சுற்றி சிலுவை பாதை திருப்பலி நடைபெறும். இரவு 8 மணி அளவில் அந்தோணியாரின் சொரூபம் வைக்கப்பட்ட மின் விளக்குகளால் அலங்கரிக்கப்பட்ட தேரை இலங்கை கடற்படை மற்றும் இருநாட்டு பக்தர்களும் சேர்ந்து தோளில் சுமந்து, ஆலயத்தை சுற்றிவரும் தேர் பவனி நடக்கிறது.