டோக்கியோ ஒலிம்பிக் போட்டிக்கு தயாராகும் வகையில் ராணி ராம்பால் தலைமையிலான இந்திய பெண்கள் ஆக்கி அணி அர்ஜென்டினாவில் சுற்றுப்பயணம் செய்து அந்த நாட்டு அணிகளுக்கு எதிராக ஆடியது. உலக தரவரிசையில் 2-வது இடத்தில் இருக்கும் அர்ஜென்டினா, 9-வது இடத்தில் உள்ள இந்திய பெண்கள் அணிகள் இடையிலான 4-வது மற்றும் கடைசி ஆட்டம் பியூனஸ் அயர்சில் நேற்று முன்தினம் இரவு நடந்தது. விறுவிறுப்பான இந்த ஆட்டம் 1-1 என்ற கோல் கணக்கில் டிராவில் முடிந்தது. இந்திய அணி தரப்பில் ராணி ராம்பால் 35-வது நிமிடத்தில் கோல் அடித்தார். 55-வது நிமிடத்தில் கிடைத்த பெனால்டி ஸ்டிரோக் வாய்ப்பை பயன்படுத்தி அர்ஜென்டினா அணி வீராங்கனை எமிலியா பார்செரியோ கோல் திருப்பினார்.

அர்ஜென்டினா அணிக்கு எதிரான முதலாவது ஆட்டத்தில் 2-3 என்ற கோல் கணக்கிலும், 2-வது ஆட்டத்தில் 0-2 என்ற கோல் கணக்கிலும் இந்திய அணி தோல்வியை சந்தித்து இருந்தது. 3-வது ஆட்டம் மழையால் ரத்து செய்யப்பட்டது. முன்னதாக நடந்த அர்ஜென்டினா ஜூனியர் அணிக்கு எதிரான ஆட்டங்களை 2-2, 1-1 என்ற கோல் கணக்கில் டிரா செய்து இருந்த இந்திய அணி 1-2, 2-3 என்ற கோல் கணக்கில் அர்ஜென்டினா பி அணியிடம் தோல்வி கண்டு இருந்தது.