கோவ்லூன்,

ஹாங்காங் ஓபன் பேட்மிண்டன் போட்டி அங்குள்ள கோவ்லூன் நகரில் நடந்து வருகிறது. இதன் பெண்கள் ஒற்றையர் முதலாவது சுற்று ஆட்டம் ஒன்றில் இந்திய வீராங்கனை பி.வி.சிந்து 21-15, 13-21, 21-17 என்ற செட் கணக்கில் தாய்லாந்தின் ஜின்டாபோலை வெளியேற்றி 2-வது சுற்றுக்கு முன்னேறினார். மற்றொரு ஆட்டத்தில் இந்தியாவின் சாய்னா நேவால் 21-10, 10-21, 19-21 என்ற செட் கணக்கில் 2-ம் நிலை வீராங்கனையான ஜப்பானின் அகானே யமாகுச்சியிடம் போராடி வீழ்ந்தார்.

ஆண்கள் ஒற்றையர் முதலாவது சுற்றில் இந்திய வீரர் ஸ்ரீகாந்த் 21-11, 21-15 என்ற நேர்செட்டில் ஹாங்காங் வீரர் வோங் விங் கி வின்சென்டை விரட்டியடித்தார். சமீர் வர்மா, பிரனாய் ஆகியோரும் தங்களது ஆட்டத்தில் வெற்றி பெற்றனர். அதே சமயம் இந்தியாவின் சாய் பிரனீத், காஷ்யப் ஆகியோர் முதல் சுற்றுடன் நடையை கட்டினர்.