11 அணிகள் இடையிலான 2-வது பெண்கள் உலகக் கோப்பை கபடி போட்டி வங்காளதேச தலைநகர் டாக்காவில் நடந்து வருகிறது. இதில் ஏ பிரிவில் நேற்று நடந்த கடைசி லீக் ஆட்டத்தில் வங்காளதேச அணி 39-31 என்ற புள்ளி கணக்கில் தாய்லாந்தை தோற்கடித்தது. இதேபோல் பி பிரிவில் நடந்த இறுதி லீக் ஆட்டம் ஒன்றில் சீன தைபே அணி 63-28 என்ற புள்ளி கணக்கில் போலந்தை பந்தாடியது.

லீக் சுற்று முடிவில் ஏ பிரிவில் இந்தியா (4 ஆட்டங்களிலும் வெற்றி) முதலிடமும், வங்காளதேசம் (3 வெற்றி, ஒரு தோல்வி) 2-வது இடமும், பி பிரிவில் சீன தைபே (5 ஆட்டங்களிலும் வெற்றி) முதலிடமும், ஈரான் (4 வெற்றி, ஒரு தோல்வி) 2-வது இடமும் பிடித்து அரையிறுதிக்கு தகுதி பெற்றன.