பழங்காலத்திலிருந்தே விளம்பரம் அவசியம் என்று உணர்ந்திருக்கிறான் மனிதன். இன்றைய காலகட்டத்தை 'விளம்பர யுகம்' எனலாம். இன்று விளம்பரப்படுத்தாத பொருட்களே இல்லை. விளம்பர யுக்திகளும் பெருகிவிட்டன. எல்லா நிறுவனங்களிலும் விளம்பரப் பிரிவு தனியாகச் செயல்பட்டு வருகிறது.
* கி.மு 1500-களில் எகிப்தில் முக்கிய கடைகளின் வாசல்களில், என்னென்ன பொருட்கள் விற்பனைக்கு இருக்கின்றன என்று குறிப்பிட்டு போர்டுகள் வைத்திருந்ததாக வரலாற்றுக் குறிப்புகள் உள்ளன. இதுதான் உலகின் முதல் விளம்பரம்.
* அச்சுக்கலை அறிமுகமானபின், விளம்பரத்தில் புரட்சி ஏற்பட்டது. கி.பி 1476-ம் ஆண்டு லண்டனில் முதன்முதலாக பிரார்த்தனை புத்தகம் ஒன்றைப் பற்றிய விளம்பரம், துண்டுப் பிரசுரங்களாக வெளியானது. இதனால் அந்தப் புத்தகம் ஒரு வாரத்தில் விற்றுத் தீர்ந்து விட்டதாம்.
* கி.பி 1625-ல் லண்டனிலிருந்து வெளிவந்த செய்தித்தாள் ஒன்றின் கடைசிப் பக்கம் விளம்பரங்களுக்காக ஒதுக்கப்பட்டு, பல துறைகளிலிருந்தும் விளம்பரங்கள் வந்தனவாம். 1771-ம் ஆண்டு அமெரிக்காவில் முதன்முதலில் பத்திரிகைகளில் விளம்பரம் வெளி வரத் தொடங்கியது.
* பத்தொன்பதாம் நூற்றாண்டிலிருந்து செய்தித்தாள் மட்டுமின்றி, வார, மாத இதழ்கள், வானொலி, டெலிவிஷன் ஆகியவற்றிலும் விளம்பரங்கள் பரவின. 1920-ம் ஆண்டுதான் வானொலிகளில் வர்த்தக விளம்பரங்கள் வர ஆரம்பித்தன. இந்தியாவில் 'விவித பாரதி வர்த்தக ஒலிபரப்பு' 1967-ம் ஆண்டு நவம்பர் 15-ந் தேதி தொடங்கப்பட்டது. தொலைக்காட்சிகளில் 1976-ம் ஆண்டு ஜனவரி 4 முதல் விளம்பரங்கள் வருகின்றன. அது இன்று வரை கொடி கட்டிப் பறக்கிறது.