தேனி,
தேனி மற்றும் அதன் சுற்றுவட்டாரப் பகுதிகளில் வாழை இலை விலை கிடுகிடுவென உயர்ந்துள்ளது. கடந்த வாரம் வரை ரூ.1,500-க்கு விற்கப்பட்ட ஒரு கட்டு வாழை இலை, தற்போது ரூ.4,000 வரை விற்பனையாவதால் பொதுமக்கள் மற்றும் வியாபாரிகள் அதிர்ச்சி அடைந்துள்ளனர்.
தேனி மாவட்ட சந்தைகளுக்கு வழக்கமாக வரும் வாழை இலைகளின் வரத்து கடந்த சில நாட்களாக கணிசமாக குறைந்துள்ளது. வரத்து குறைவு ஒருபுறம் இருக்க, மறுபுறம் ஆவணி மாத தொடர் முகூர்த்த நாட்கள் மற்றும் ஓணம் பண்டிகை அடுத்தடுத்து வருவதால் வாழை இலையின் தேவை பல மடங்கு அதிகரித்துள்ளது.
தேவையை பயன்படுத்தி, தேனி சந்தையில் 180 இலைகள் கொண்ட ஒரு கட்டு வாழை இலையின் விலை ரூ.4,000 ஆக உயர்ந்துள்ளது. சில்லறை விற்பனையில் ஒரு இலை ரூ.25 முதல் ரூ.30 வரை விற்கப்படுகிறது. ஓணம் பண்டிகை நெருங்குவதால் வரும் நாட்களில் இதன் விலை மேலும் உயரக்கூடும் என்று வியாபாரிகள் தெரிவிக்கின்றனர்.
