சென்னை,
தமிழகத்தில் கொரோனாவால் பாதிக்கப்பட்டவர்களுக்கு சிகிச்சை அளிக்க ஆக்சிஜன் தேவை அதிகரிக்க தொடங்கி நிலையில், தெற்கு ரெயில்வேயின் உதவியால், வெளிமாநிலங்களில் இருந்து தமிழகத்துக்கு ஆக்சிஜன் வினியோகம் செய்யப்பட்டு வருகிறது.
அந்த வகையில் கடந்த மாதம் 14-ந் தேதி, தமிழகத்துக்கு முதல் ஆக்சிஜன் ரெயில் வந்தது. தொடர்ந்து மேற்கு வங்காளம், ஒடிசா, மராட்டியம் உள்ளிட்ட பல்வேறு மாநிலங்களில் இருந்து ஆக்சிஜன் நிரப்பப்பட்ட ரெயில்கள் தண்டையார்பேட்டை, மதுக்கரை, மீளவிட்டான் போன்ற இடங்களுக்கு வருகின்றன.
இந்த நிலையில் நேற்று 62-வது ஆக்சிஜன் ரெயில் ஒடிசா மாநிலம் ரூர்கேலாவில் இருந்து கோவைக்கு 4 டேங்கர்கள் மூலம் 86.22 டன் ஆக்சிஜனை கொண்டு வந்தது. இதுவரை தமிழகத்துக்கு தெற்கு ரெயில்வே மூலம் 4,500 டன் ஆக்சிஜன் வினியோகம் செய்யப்பட்டிருப்பது குறிப்பிடத்தக்கது.
அதேபோல் கேரள மாநிலத்துக்கு 513.72 டன் ஆக்சிஜன் வினியோகிக்கப்பட்டுள்ளது. அந்தவகையில் தெற்கு ரெயில்வே மூலம் இதுவரை 5 ஆயிரம் டன் ஆக்சிஜன் வினியோகிக்கப்பட்டுள்ளது.