சென்னையை அடுத்து உள்ள நெற்குன்றத்தில் 500 மில்லி மீட்டர் விட்டமுள்ள குடிநீர் குழாய் அருகில் உள்ள 1,900 மில்லி மீட்டர் விட்டமுள்ள பிரதான குழாயுடன் இணைக்கும் பணிகள் நாளை (வெள்ளிக்கிழமை) காலை 10 மணி முதல் இரவு 8 மணி வரை நடக்கிறது. பணிக்காக நெற்குன்றம் வி.ஜி.பி. அமுதா மெயின் ரோட்டில் உள்ள குடிநீர் வால்வு மூடப்படுகிறது. இதனால், அம்பத்தூர் வார்டு எண்.87 முதல் 93 வரை உள்ள பகுதிகளில் குடிநீர் வினியோகம் நிறுத்தம் செய்யப்படுகிறது. பொதுமக்கள் முன்னெச்சரிக்கையாக, வேண்டிய அளவு குடிநீரை சேமித்து வைத்துக்கொள்ள வேண்டும்.

மேலும் அவசர தேவைகளுக்கு லாரிகள் மூலம் குடிநீர் பெற்றுக்கொள்ள அம்பத்தூர் பகுதி பொறியாளர் செல்போன் எண்.81449-30907 தொடர்பு கொண்டு பயனடையலாம் என்றும் சென்னை குடிநீர் வாரிய அதிகாரிகள் தெரிவிக்கின்றனர்.