சேலம் மாவட்டத்தில் கடந்த ஓராண்டில் மட்டும் 33 ஆயிரத்து 85 பேருக்கு கொரோனா பாதிப்பு ஏற்பட்டுள்ளது. 468 பேர் கொரோனாவால் பரிதாபமாக பலியாகி உள்ளனர். இதில் பெண்கள், இளைஞர்கள், முதியவர்கள் என பலரும் அடங்குவர். மேலும் 32 ஆயிரத்து 440 பேர் கொரோனாவுக்கு சிகிச்சை பெற்று குணமடைந்துள்ளனர்.

மீண்டும் அதிகரிப்பு

இந்த நிலையில் கடந்த 2 மாதங்களுக்கு மேலாக மாவட்டத்தில் கொரோனா வைரசின் பாதிப்பு குறைந்து வந்தது. குறிப்பாக பல நாட்கள் 20-க்கும் குறைவாக இருந்தது. இதனால் பொதுமக்கள் சற்று நிம்மதி அடைந்தனர். ஆனால் கடந்த சில நாட்களாக கொரோனா தொற்று மீண்டும் அதிகரித்து வருகிறது.

இதுகுறித்து சுகாதாரத்துறை அதிகாரிகள் கூறும் போது, கொரோனா வைரசை கட்டுப்படுத்த தொடர்ந்து பல்வேறு நடவடிக்கைகள் எடுக்கப்பட்டு வருகிறது. தற்போது கொரோனா பாதிப்பு அதிகரிப்பு காரணமாக கொரோனா தடுப்பூசி போடுவதற்கு பொதுமக்கள் அதிகம் ஆர்வம் காட்டி வருகின்றனர். இருந்தாலும் பொதுமக்கள் முககவசம் அணிவதுடன் சமூக இடைவெளியை கடைபிடித்தால் தான் கொரோனா வைரசில் இருந்து தப்பித்து கொள்ள முடியும் என்றனர்