தி.மு.க. இளைஞர் அணி செயலாளர் உதயநிதி ஸ்டாலின், நேற்று முன்தினம் திருக்குவளையில் சட்ட சபை தேர்தல் பிரசாரத்தில் ஈடுபட்டு கைதானார். பின்னர் விடுதலையான அவர், 2-வது நாளாக நேற்று நாகை துறைமுகத்தில் சட்டசபை தேர்தல் பிரசாரத்தை தொடங்கினார். இதையடுத்து போலீசார் அவரை மீண்டும் கைது செய்தனர். இதற்கு கண்டனம் தெரிவித்து திண்டுக்கல்லில், கிழக்கு மாவட்ட செயலாளர் இ.பெ.செந்தில்குமார் எம்.எல்.ஏ. தலைமையில் அவைத்தலைவர் பசீர் அகமது, மாவட்ட துணை செயலாளர்கள் நாகராஜன், தண்டபாணி, தலைமை செயற்குழு உறுப்பினர் காந்திராஜன், நகர செயலாளர் ராஜப்பா, ஒன்றிய செயலாளர் நெடுஞ்செழியன் மற்றும் நகர, ஒன்றிய தி.மு.க. நிர்வாகிகள், இளைஞரணி, மாணவரணியினர் பெரியார் சிலை நோக்கி ஊர்வலமாக சென்றனர்.

அப்போது பஸ் நிலையம் அருகே ஏ.எம்.சி. சாலையில் அவர்களை போலீசார் தடுத்து நிறுத்தினர். இதனால் தி.மு.க.வினர் அங்கு சாலை மறியலில் ஈடுபட்டனர். இந்த மறியலில் ஈடுபட்ட தி.மு.க. பெண் நிர்வாகிகள் 5 பேர் உள்பட 150 பேரை போலீசார் கைது செய்தனர்.