புதுச்சேரி கிழக்கு மாநில அ.தி.மு.க. சார்பில் உப்பளத்தில் உள்ள கட்சியின் தலைமை அலுவலகத்தில் எம்.ஜி.ஆர். பிறந்த நாள் விழா கொண்டாடப்பட்டது. விழாவிற்கு மாநில செயலாளர் அன்பழகன் எம்.எல்.ஏ. தலைமை தாங்கி, அங்குள்ள எம்.ஜி.ஆர். சிலைக்கு மாலை அணிவித்து மரியாதை செலுத்தினார்.

நிகழ்ச்சியில் எம்.எல்.ஏ.க்கள் பாஸ்கர், வையாபுரி மணிகண்டன், முன்னாள் எம்.எல்.ஏ. ராஜாராமன், முன்னாள் கவுன்சிலர் கணேசன், நகர செயலாளர் அன்பானந்தம், ஜெயலலிதா பேரவை மாநில இணை செயலாளர் எம்.ஏ.கே. கருணாநிதி, தொழிற்சங்க செயலாளர் பாப்புசாமி மற்றும் பலர் கலந்து கொண்டனர். அங்கு பொதுமக்களுக்கு இனிப்பு வழங்கப்பட்டது.

பின்னர் அவர்கள் வாகனத்தில் அலங்கரித்து வைக்கப்பட்ட எம்.ஜி.ஆர். உருவ படத்துடன் மேள தாளம் முழங்க, பாரம்பரிய கலை விளையாட்டுகளுடன் ஊர்வலமாக மறைமலை அடிகள் சாலையில் உள்ள எம்.ஜி.ஆர். சிலைக்கு சென்றனர். அங்கு சிலைக்கு மாலை அணிவித்து மரியாதை செலுத்தினர்.

புதுச்சேரி மேற்கு மாநில அ.தி.மு.க. சார்பில் லெனின் வீதியில் உள்ள கட்சி தலைமை அலுவலகத்தில் நடந்த விழாவில் அவரது உருவப்படத்திற்கு மாநில செயலாளர் ஓம் சக்தி சேகர் மலர் தூவி மரியாதை செலுத்தினார். தொடர்ந்து கட்சி கொடியை ஏற்றி வைத்து பொதுமக்களுக்கு இனிப்பு வழங்கினார்.

நிகழ்ச்சியில் கோகுலகிருஷ்ணன் எம்.பி., மாநில இணை செயலாளர்கள் திருநாவுக்கரசு, காசிநாதன், பேராசிரியர் ராமதாஸ், முன்னாள் எம்.எல்.ஏ. பெரியசாமி, சுத்துக்கேணி பாஸ்கர், பிரபுதாஸ் மற்றும் பலர் கலந்துகொண்டனர். பின்னர் அவர்கள் அங்கிருந்து மேள தாளங்களுடன் ஊர்வலமாக சென்று மறைமலை அடிகள் சாலையில் உள்ள எம்.ஜி.ஆர். சிலைக்கு மாலை அணிவித்து மரியாதை செலுத்தினர்.

அ.ம.மு.க. மாநில செயலாளர் வேல்முருகன் தலைமையில் எம்.ஜி.ஆர். சிலைக்கு மாலை அணிவித்து மரியாதை செலுத்தப்பட்டது. நிகழ்ச்சியில் முன்னாள் எம்.எல்.ஏ. அருள், அவைத்தலைவர் சுப்ரமணியன், இணை செயலாளர் விமலாஸ்ரீ, பொருளாளர் டாக்டர் வீரப்பன், துணை செயலாளர் தமிழரசி, செல்வம் மற்றும் கட்சி நிர்வாகிகள், தொண்டர்கள் பலர் கலந்துகொண்டனர்.