பொங்கல் பரிசு தொகுப்புக்கான டோக்கன்களை பொதுமக்களுக்கு வழங்குவதற்காக ரேஷன் கடைகளுக்கு அனுப்பி வைக்கப்பட்டது. அந்த டோக்கன்களை ரேஷன் கடை பணியாளர்கள் நேற்று முதல் வருகிற 31-ந்தேதி வரை வீடு, வீடாக சென்று வழங்க உத்தரவிடப்பட்டு உள்ளது. அதன்படி ரேஷன் கடை பணியாளர்கள் டோக்கன் வழங்கும் பணியை நேற்று தொடங்கினார்கள்.

நெல்லை மாவட்டத்தில் மொத்தம் 796 ரேஷன் கடைகள் உள்ளன. இந்த கடைகளுக்கு உட்பட்டு 4 லட்சத்து 57 ஆயிரத்து 98 ரேஷன் கார்டுதாரர்கள் உள்ளனர். இவர்களுக்கு பொங்கல் பரிசு வழங்க வீடு, வீடாக டோக்கன் வழங்கும் பணி நேற்று தொடங்கியது. அதன்படி கடை ஊழியர்கள் தங்கள் பகுதியில் உள்ள ரேஷன் கார்டுதாரர்களுக்கு டோக்கன் வழங்கும் பணியை தொடங்கினார்கள். இதேபோல் அகதிகள் முகாமை சேர்ந்த 635 ரேஷன் கார்டுதாரர்களுக்கும் டோக்கன் வழங்கும் பணி தொடங்கியது.

முற்றுகை

நெல்லை மாநகராட்சி பகுதியிலும் ரேஷன் கார்டுதாரர்களுக்கு டோக்கன் வழங்கும் பணி நடந்தது. இந்த நிலையில் நெல்லை வண்ணார்பேட்டை பகுதியை சேர்ந்த மக்கள் தங்களுக்கு டோக்கன் வழங்கவில்லை என கூறி ரேஷன் கடையை முற்றுகையிட்டனர். இதனால் அங்கு சிறிது நேரம் பரபரப்பு ஏற்பட்டது.

இதேபோல் மாநகரில் மேலும் சில பகுதிகளில் டோக்கன் வினியோகம் செய்யப்படவில்லை எனக்கூறி சம்பந்தப்பட்ட ரேஷன் கடைகளுக்கு மக்கள் சென்றனர். ஆனால்,, கடைகள் அடைக்கப்பட்டு இருந்ததால் பொதுமக்கள் போராட்டத்தில் ஈடுபட்டனர்.

அதிகாரிகள் விளக்கம்

இதுகுறித்து அதிகாரிகளிடம் கேட்டபோது அவர்கள் கூறியதாவது:-

அரசு வருகிற 31-ந் தேதி வரை பொதுமக்களுக்கு டோக்கன் வினியோகம் செய்ய அறிவுறுத்தி உள்ளது. கொரோனா காலத்தில் இருந்தே டோக்கன் முறையில் பொருட்களை கொடுத்து வருகிறோம். இது எங்களுக்கு புதிதல்ல. டோக்கன் வழங்கும் பணி பெரும்பாலான பகுதிகளில் தொடங்கப்பட்டு உள்ளது. சில பகுதியில் தொடங்கவில்லை. அங்கு விரைவில் டோக்கன் வழங்க ஏற்பாடு நடைபெற்று வருகிறது. எனவே, பொதுமக்கள் அச்சப்பட தேவையில்லை.

இவ்வாறு அவர்கள் கூறினார்கள்.