ஆடி மாத 4-வது வெள்ளிக்கிழமையையொட்டி தர்மபுரி நகரில் உள்ள அனைத்து அம்மன் கோவில்களிலும் நேற்று சிறப்பு வழிபாடு மற்றும் ஆராதனைகள் நடைபெற்றன. இதையொட்டி அம்மனுக்கு சிறப்பு அபிஷேகமும், அலங்கார சேவையும் நடைபெற்றது. இதில் ஏராளமான பெண்கள் கலந்து கொண்டு மாவிளக்கு எடுத்தும், பொங்கல் வைத்தும் வழிபாடு நடத்தினார்கள்.

தர்மபுரி கோட்டை கல்யாண காமாட்சி அம்மன் கோவிலில் ஆடி மாத 4-வது வெள்ளிக்கிழமையையொட்டி அம்மனுக்கு சிறப்பு பூஜைகள் நடைபெற்றது. இந்த வளாகத்தில் உள்ள ராஜதுர்க்காம்பிகை அம்மனுக்கு மகாஅபிஷேகமும், யாகபூஜையும் நடைபெற்றது. பின்னர் கல்யாண காமாட்சியம்மன் அட்சயாதேவி- அன்னபூரணி அலங்காரத்தில் பக்தர்களுக்கு அருள்பாலித்தார். இதில் திரளான பக்தர்கள் கலந்து கொண்டு சாமிதரிசனம் செய்தனர்.