இதையடுத்து களியக்காவிளை தனிப்படை போலீசார் நேற்று முன்தினம் நள்ளிரவு நெல்லைக்கு வந்தனர். பின்னர் நேற்று அதிகாலை 4 மணியளவில் நெல்லை பேட்டையில் உள்ள ரகுமான்பேட்டை 4-வது தெருவுக்குள் திடீரென்று சென்றனர். அவர்களுடன் சிறப்பு புலனாய்வு பிரிவு அதிகாரிகள், கியூ பிரிவு போலீசார், பேட்டை போலீசாரும் சென்றனர்.

பின்னர் அங்குள்ள அல்கபீர் என்பவரது வீட்டில் அதிரடியாக நுழைந்து சோதனை நடத்தினர். அல்கபீர் அந்த வீட்டில் உள்ளாரா? என்று தேடினர். ஆனால், அங்கு அவர் இல்லை.

இதையடுத்து வீட்டில் இருந்த அவரது தந்தை சாகுல் அமீது மற்றும் குடும்பத்தினரிடம் போலீசார் துருவி, துருவி விசாரணை நடத்தினர். அப்போது அல்கபீர் கடந்த 5 நாட்களாக வீட்டுக்கு வரவில்லை என்றும், அவரது செல்போனை தொடர்பு கொள்ள முடியவில்லை என்றும் அவர்கள் பதில் அளித்தனர்.

இதையடுத்து அல்கபீர் வீடு முழுவதும் போலீசார் சோதனை நடத்தினர். அதிகாலை 4 மணி முதல் 6 மணி வரை இந்த சோதனை நடைபெற்றது. ஆனால், சந்தேகப்படும் படியான பொருட்கள் எதுவும் சிக்கவில்லை என்று கூறப்படுகிறது.

28 வயது நிரம்பிய அல்கபீர் தென்காசியை பூர்வீகமாக கொண்டவர். இவர் நெல்லை பேட்டை ரகுமான்பேட்டை 4-வது தெருவில் வசித்து வருகிறார். நெல்லை வழுக்கோடை பகுதியில் தன்னுடைய தம்பி நடத்தி வரும் மொபட், மோட்டார் சைக்கிள்களுக்கு சீட் கவர் தைக்கும் கடையில் வேலை செய்து வந்தார்.

இதற்கிடையே, பெங்களூருவில் 3 நாட்களுக்கு முன்பு தீவிரவாதிகளுக்கு ஆதரவாக செயல்பட்ட 3 பேர் பிடிபட்டனர். அந்த சம்பவத்திலும் அல்கபீருக்கு தொடர்பு உண்டா? என்ற கோணத்திலும் போலீசார் விசாரணை நடத்தி வருகின்றனர்.

சப்-இன்ஸ்பெக்டர் கொலை தொடர்பாக போலீசார் நடத்திய இந்த அதிரடி சோதனை நெல்லையில் பரபரப்பை ஏற்படுத்தி உள்ளது.