கொரோனா நிவாரண நிதியாக மாற்றுத்திறனாளிகளுக்கு தலா ரூ.5 ஆயிரம் நிவாரணம் வழங்க வேண்டும் என்பதை வலியுறுத்தி சிவகாசியில் உள்ள தாலுகா அலுவலகத்தில் குடியேறும் போராட்டம் நடத்துவதாக தமிழ்நாடு அனைத்து வகை மாற்றுத்திறனாளிகள் மற்றும் பாதுகாப்போர் உரிமைகளுக்கான சங்கத்தினர் அறிவித்து இருந்தனர்.

இந்த நிலையில் நேற்று காலை 10 மணிக்கு தாலுகா அலுவலகம் வந்த 30-க்கும் மேற்பட்ட மாற்றுத்திறனாளிகள் போராட்டத்தை தொடங்கினர். அப்போது அங்கு பாதுகாப்புக்கு நின்ற போலீசார் மற்றும் வருவாய்த்துறை அதிகாரிகள் மாற்றுத்திறனாளிகளிடம் பேச்சுவார்த்தை நடத்தினர். இதில் மாற்றுத்திறனாளிகளின் கோரிக்கையை தமிழக அரசின் கவனத்துக்கு கொண்டு செல்வதாக உறுதி அளித்ததன் பேரில் 2 மணி நேரத்துக்கும் மேலாக நீடித்த போராட்டம் கைவிடப்பட்டது.