பழனியை அடுத்த தொப்பம்பட்டியில் அங்காளம்மன் கோவில் அமைந்துள்ளது. இந்த கோவிலில் ஆடித்திருவிழா நேற்று முன்தினம் தொடங்கியது. திருவிழாவையொட்டி ஆண்டுதோறும் மாட்டுத்தாவணி எனப்படும் மாட்டுச்சந்தை நடைபெறும். அந்த வகையில் நேற்று தொப்பம்பட்டியில் மாட்டுச்சந்தை தொடங்கியது. 5 நாட்கள் நடக்கும் இந்த சந்தையில் பழனி, ஒட்டன்சத்திரம், கள்ளிமந்தையம், பொள்ளாச்சி, உடுமலை, தொப்பம்பட்டி, கிணத்துக்கடவு உள்ளிட்ட பகுதிகளில் இருந்து விவசாயிகள் தாங்கள் வளர்க்கும் மாடுகள், காளைகளை கொண்டு வந்து விற்பனை செய்வது வழக்கம்.

சந்தையில், ரேக்ளா பந்தயம் மற்றும் ஜல்லிக்கட்டுக்கு பயன்படுத்தப்படும் காளைகள், கறவை பசுக்கள், உழவு மாடுகள், காங்கேயம், புலிக்குளம் உள்ளிட்ட நாட்டின மாடுகள், காளைகளும் விற்பனைக்காக கொண்டுவரப்படும். அவற்றை தமிழகம் மட்டுமின்றி கேரளா, கர்நாடகா, ஆந்திரா போன்ற மாநிலங்களில் இருந்து வரும் வியாபாரிகள் வாங்கி செல்வார்கள்.