அதன்படி இந்தியாவுக்கான அமெரிக்க தூதர் கென்னத் ஐ.ஜஸ்டர் உள்பட 15 நாடுகளின் தூதர்கள் நேற்று சிறப்பு விமானம் மூலம் ஸ்ரீநகர் அழைத்து செல்லப்பட்டனர். இந்த குழுவில் வங்காளதேசம், வியட்நாம், நார்வே, மாலத்தீவுகள், தென்கொரியா, மொராக்கோ, நைஜீரியா உள்ளிட்ட நாடுகளின் தூதர்களும் இடம்பெற்றனர்.

இந்த குழுவினரை ஸ்ரீநகரில் ஜம்மு-காஷ்மீர் யூனியன் பிரதேசத்தின் சிறப்பு அதிகாரிகள் வரவேற்றனர். பின்னர் தூதர்கள் அனைவரும் அங்குள்ள ராணுவ கண்டோன்மென்டுக்கு அழைத்து செல்லப்பட்டனர். இந்த குழுவினருடன் மத்திய வெளியுறவுத்துறை செயலாளர் விகாஸ் ஸ்வரூப்பும் உடன் சென்றார்.

காஷ்மீரில் நிலவும் தற்போதைய சூழல் குறித்து ராணுவ உயர் அதிகாரிகள், வெளிநாட்டு தூதர்களுக்கு விளக்கினர். குறிப்பாக பாகிஸ்தான் தரப்பில் இருந்து இந்தியாவுக்கு வரும் அச்சுறுத்தல் மற்றும் காஷ்மீரின் பாதுகாப்பு சூழல்கள் குறித்து அவர்கள் எடுத்துக்கூறினர்.

பின்னர் இந்த குழுவினர் காஷ்மீரை சேர்ந்த உள்ளூர் அரசியல் தலைவர்கள், உள்ளூர் ஊடக பிரதிநிதிகள் குழுக்களையும் சந்தித்து பேசினர். இதில் மாநிலத்தின் சிறப்பு அந்தஸ்து நீக்கப்பட்டபின் அங்கு நிலவும் சூழல் குறித்து உள்ளூர் அரசியல் தலைவர்கள் மற்றும் ஊடகத்தினர் எடுத்துரைத்தனர். இந்த சந்திப்புகளுக்கு இடையே உள்ளூர் பிரதிநிதிகளையும் தூதர் கள் சந்தித்தனர். அங்குள்ள நிலவரத்தை கேட்டு அறிந்தனர்.

மேலும் பல்வேறு தரப்பினரை சந்தித்துவிட்டு ஜம்மு சென்ற வெளிநாட்டு தூதர்கள் இரவில் அங்கேயே தங்கினர். இந்த பயணத்தின் 2-வது நாளான இன்று அவர்கள் மேலும் சில பகுதிகளுக்கு சென்று அங்குள்ள சூழ்நிலைகளை பார்வையிட்டு, பின்னர் டெல்லி திரும்புவார்கள் என கூறப்படுகிறது.

வெளிநாட்டு தூதர்களின் இந்த பயணத்துக்கு ஏற்பாடு செய்ததற்காக மத்திய அரசுக்கு எதிர்க்கட்சிகள் கண்டனம் தெரிவித்து உள்ளன. காஷ்மீரின் கள நிலவரம் குறித்து ஆய்வு செய்வதற்கு வெளிநாட்டு தூதர்களை அனுமதிக்கும் மத்திய அரசு, உள்நாட்டை சேர்ந்த அரசியல் தலைவர்களுக்கு அனுமதி மறுப்பது ஏன்? என காங்கிரஸ் கட்சி கேள்வி எழுப்பி உள்ளது.

காஷ்மீரில் சுமுகமான நிலை நிலவியிருந்தால், அங்குள்ள அரசியல் தலைவர்கள் பலர் தொடர்ந்து வீட்டுக்காவலில் வைத்திருப்பது ஏன்? என வெளிநாட்டு தூதர்களை கேட்க விரும்புவதாக தேசிய மாநாடு கட்சி கூறியுள்ளது. இதைப்போல மெகபூபா முப்தியின் மக்கள் ஜனநாயக கட்சியும் வெளிநாட்டு தூதர்களின் பயணம் குறித்து கேள்வி எழுப்பியுள்ளது.