பல்லாரி வெங்காயம் மற்றும் சாம்பார் வெங்காயம் விலை உயர்வு இல்லத்தரசிகளுக்கு தீராத தலைவலியை ஏற்படுத்தியுள்ளது. வெங்காயம் விலை குறைவதை எதிர்நோக்கி அவர்கள் காத்திருக்கிறார்கள்.

இதுகுறித்து கோயம்பேடு மொத்த மார்க்கெட் வியாபாரிகள் சங்க ஆலோசகர் சவுந்தரராஜன் கூறியதாவது:-

தமிழகத்தில் திண்டுக்கல், திருச்சி, பெரம்பலூர், ஒட்டன்சத்திரம் உள்ளிட்ட பல்வேறு இடங்களில் இருந்து சாம்பார் வெங்காயம் கோயம்பேடு மார்க்கெட்டுக்கு கொண்டுவரப்படுகிறது. நாள்தோறும் சராசரியாக 10 லாரிகளில் சாம்பார் வெங்காயம் கொண்டுவரப்படும். ஆனால் சமீபத்தில் பெய்த மழை காரணமாக சாம்பார் வெங்காயத்தின் விளைச்சல் பாதிக்கப்பட்டுள்ளது.

இதனால் தற்போது 5 லாரிகளில் மட்டுமே கொண்டு வரப்படுகிறது. இதுவே விலை உயர்வுக்கு காரணம். சாம்பார் வெங்காயத்தின் விளைச்சல் இன்னும் 2 மாதத்துக்கு (பிப்ரவரி மாதம்) பின்னர் தான் இயல்பு நிலைக்கு திரும்பும் என்று எதிர்பார்க்கப்படுகிறது. அப்போதுதான் விலை குறைவதற்கு வாய்ப்பு இருக்கிறது. பல்லாரி வெங்காயத்தின் விலை பொங்கல் பண்டிகைக்கு பின்னர் இயல்பு நிலைக்கு திரும்பிவிடும் என்று கருதுகிறோம்.

இவ்வாறு அவர் கூறினார்.