தூத்துக்குடி,
தூத்துக்குடியில் உள்ள ஒரு சினிமா தியேட்டரில் சமீபத்தில் வெளியான கர்ணன் படம் திரையிடப்பட்டு உள்ளது. இந்த படத்தை பார்ப்பதற்காக நேற்றுமுன்தினம் இரவு 10.15 மணிக்கு 5 வாலிபர்கள் வந்தனர். அவர்கள் சினிமா டிக்கெட் எடுத்து இருந்தனர்.
ஆனால் அவர்கள் மது குடித்து இருந்ததால், தியேட்டருக்குள் செல்ல ஊழியர்கள் அனுமதி மறுத்தனர். தொடர்ந்து அவர்களிடம் டிக்கெட்டுக்கான பணத்தையும் திருப்பி கொடுத்து வெளியேற்றினர்.
இதனால் ஆத்திரம் அடைந்த 5 பேரும் அங்கிருந்து சென்று விட்டனர். பின்னர் படம் திரையிடப்பட்டது. படம் ஓடிக் கொண்டிருந்தபோது, அந்த 5 வாலிபர்களும் மீண்டும் தியேட்டருக்கு வந்தனர். அவர்கள் திடீரென தாங்கள் மறைத்து வைத்திருந்த பெட்ரோல் குண்டை தியேட்டருக்குள் வீசினர். அந்த பெட்ரோல் குண்டு, தியேட்டர் வளாகத்தில் விழுந்து வெடித்து சிதறியது. பின்னர் 5 வாலிபர்களும் அங்கிருந்து தப்பி சென்று விட்டனர்.
இதுகுறித்து தகவல் அறிந்ததும், தூத்துக்குடி தென்பாகம் போலீசார் சம்பவ இடத்துக்கு விரைந்து சென்று பார்வையிட்டு விசாரணை நடத்தினர். இதுதொடர்பாக போலீசார் வழக்குப்பதிவு செய்து, சிலரை பிடித்து விசாரணை நடத்தி வருகின்றனர்.