புதுடெல்லி:
பெண்கள் 20 ஓவர் கிரிக்கெட் போட்டியின் அடிப்படையில் வீராங்கனைகளின் புதிய தரவரிசைப்பட்டியலை சர்வதேச கிரிக்கெட் கவுன்சில் (ஐ.சி.சி.) வெளியிட்டுள்ளது.
இதன்படி பேட்டர்கள் தரவரிசையில் ஆஸ்திரேலிய வீராங்கனை பெத்மூனி முதலிடத்தில் நீடிக்கிறார். இந்திய வீராங்கனைகள் மந்தனா 4-வது இடத்திலும், ஷபாலி வர்மா 6-வது இடத்திலும் தொடருகின்றனர்.
இந்திய வீராங்கனை தீப்தி ஷர்மா 3 இடங்கள் அதிகரித்து 34-வது இடத்தையும், மற்றொரு இந்திய வீராங்கனை ரிச்சா கோஷ் 4 இடம் உயர்ந்து 75-வது இடத்தையும் பிடித்துள்ளனர்.
பந்து வீச்சாளர்கள் தரவரிசையில் இங்கிலாந்து சுழற்பந்து வீச்சாளர் சோபி எக்லெஸ்டென் மாற்றமின்றி முதலிடத்தில் தொடருகிறார். இந்திய சுழற்பந்து வீச்சாளர் தீப்தி ஷர்மா ஒரு இடம் சரிந்து 7-வது இடத்தை பெற்றுள்ளார். இந்திய வேகப்பந்து வீச்சாளர் ரேணுகா சிங் 5 இடங்கள் முன்னேறி 13-வது இடத்தை பிடித்துள்ளார்.