புதுடெல்லி,
இந்திய மகளிர் ஒரு நாள் கிரிக்கெட் போட்டி அணிக்கான கேப்டன் மிதாலி ராஜ், ஐ.சி.சி. மகளிர் ஒரு நாள் கிரிக்கெட் போட்டிக்கான பேட்டிங் தரவரிசை பட்டியலில் மீண்டும் முதலிடத்துக்கு முன்னேறியுள்ளார்.
சமீபத்திய வாராந்திர தரவரிசை பட்டியல் வெளியீட்டில், வெஸ்ட் இண்டீஸ் மற்றும் பாகிஸ்தான் ஆகிய 2 அணிகளுக்கு இடையேயான ஒரு நாள் கிரிக்கெட் தொடரின் கடைசி 3 ஆட்டங்கள் கணக்கில் கொள்ளப்பட்டு தரவரிசை புதுப்பிக்கப்பட்டு உள்ளது.
இதில் பெரிய ஸ்கோரை குவிக்காத வெஸ்ட் இண்டீஸ் கேப்டன் ஸ்டெபானி டெய்லர் (49 மற்றும் 21 ரன்கள்), 30 புள்ளிகளை இழந்து முதலிடத்தில் இருந்து இறங்கியுள்ளார்.
இதனால், 762 புள்ளிகளை கொண்ட மிதாலி ராஜ் முதலிடத்திற்கு முன்னேறியுள்ளார். அவர் பேட்டிங் தரவரிசையில் முதன்முதலாக 16 ஆண்டுகளுக்கு முன்பு முதலிடம் பிடித்தார். இவர் முதலிடம் பிடிப்பது தற்போது 9வது முறையாகும்.
வெஸ்ட் இண்டீசின் டெய்லர், கணக்கில் கொள்ளப்பட்ட 3 போட்டிகளில் விக்கெட் எதுவும் கைப்பற்றாத நிலையில், பந்து வீச்சாளர்கள் தரவரிசையிலும் முதல் இடத்தில் இருந்து 3 இடங்கள் இறங்கியுள்ளார்.