ரோகித் சர்மா 127 ரன்கள் எடுத்து இருந்த நிலையில், ஆண்டர்சன் பந்தில் ஆட்டமிழந்தார். அடுத்த சில நிமிடங்களில் புஜாராவும் 61 ரன்களில் வெளியேறி ரசிகர்களுக்கு அதிர்ச்சி அளித்தார். அடுத்தடுத்து இரு முக்கிய விக்கெட்டுகளை இந்திய அணி பறிகொடுத்த நிலையில், கேப்டன் கோலியுடன் ஜடேஜா ஜோடி சேர்ந்து சிறப்பான ஆட்டத்தை வெளிப்படுத்தினார்.

போதிய வெளிச்சமின்மை காரணமாக 3-வது நாள் ஆட்டம் முன்கூட்டியே நிறுத்திக்கொள்ளப்பட்டது. 3-ஆம் நாள் ஆட்ட நேர முடிவில் இந்திய அணி 3 விக்கெட் இழப்புக்கு 270 ரன்கள் சேர்த்தது. விராட் கோலி 22 ரன்களிலும் ஜடேஜா 9 ரன்களிலும் களத்தில் இருந்தனர். இந்திய அணி 171 ரன்கள் முன்னிலை பெற்றிருந்தது.

இந்நிலையில், 4-ம் நாள் ஆட்டம் இன்று நடைபெற்று வருகிறது. போட்டி தொடங்கிய சில நிமிடங்களில் கிறிஸ் வோக்ஸ் பந்து வீச்சில் ஜடேஜா (17 ரன்கள்) எல்பிடபுள்யூ முறையில் அவுட் ஆனார். அடுத்து வந்த ரஹானேவும் (0) ரன் எதுவும் எடுக்காமல் வெளியேறினார். பொறுப்புடன் ஆடிய கேப்டன் விராட் கோலி 44 ரன்கள் எடுத்திருந்த நிலையில் மொயீன் அலி பந்து வீச்சில் வெளியேறினார்.

அடுத்து களமிறங்கிய ரிஷப் பண்ட் மற்றும் ஷர்துல் தாக்குர் சிறப்பான ஆட்டத்தை வெளிப்படுத்தினர். தற்போதைய நிலவரப்படி, இந்திய அணி இரண்டாவது இன்னிங்சில் 6 விக்கெட் இழப்புக்கு 363 ரன்கள் குவித்துள்ளது. பண்ட் 32 ரன்களுடனும், ஷர்துல் 29 ரன்களுடனும் களத்தில் உள்ளனர். இதனால், இந்தியா தனது இரண்டாவது இன்னிங்சில் இங்கிலாந்தை விட 264 ரன்கள் முன்னிலையில் உள்ளது.