உலகக் கோப்பை வில்வித்தை (நிலை 1) போட்டி துருக்கியில் உள்ள அண்டால்யா நகரில் நடந்து வருகிறது. இதில் நேற்று நடந்த காம்பவுண்ட் கலப்பு அணிகள் பிரிவின் இறுதிப்போட்டியில் இந்தியாவின் ஜோதி சுரேகா வென்னம்-ஒஜாஸ் தியோதால் இணை 159-154 என்ற புள்ளி கணக்கில் சீன தைபேயின் சென் யி ஹூன்-சென் ஷிக் லுன் ஜோடியை வீழ்த்தி தங்கப்பதக்கத்தை தனதாக்கியது.

உலகக் கோப்பை காம்பவுண்ட் கலப்பு அணிகள் பிரிவில் இந்தியா தங்கப்பதக்கம் வெல்வது இது 2-வது முறையாகும். ஏற்கனவே கடந்த ஆண்டு பாரீசில் நடந்த உலகக் கோப்பை போட்டியில் இந்தியாவின் ஜோதி சுரேகா வென்னம், அபிஷேக் வர்மாவுடன் இணைந்து இதே பிரிவில் தங்கப்பதக்கத்தை வென்று இருந்தார் என்பது குறிப்பிடத்தக்கது.