பார்சிலோனா,
ஸ்பெயினில், கிளப் அணிகளுக்கான லா லிகா கால்பந்து போட்டி நடந்து வருகிறது. இதில் நேற்று முன்தினம் இரவு நடந்த ஒரு ஆட்டத்தில் நட்சத்திர வீரர்களை உள்ளடக்கிய பார்சிலோனா அணி 5-2 என்ற கோல் கணக்கில் ரியல் மாலோர்கோவை பந்தாடியது. பார்சிலோனா வீரர் லூயிஸ் சுவாரஸ் 43-வது நிமிடத்தில் பின்வாக்கில் உதைத்த பந்து (பேக் ஹீல்) கோலுக்குள் நுழைந்ததை பார்த்த ரசிகர்கள் பரவசத்தில் ஆர்ப்பரித்தனர். இதே போல் பார்சிலோனா முன்னணி வீரர் லயோனல் மெஸ்சி (17, 41, 83-வது நிமிடம்) ஹாட்ரிக் கோல் அடித்ததும் இந்த ஆட்டத்தில் இன்னொரு சிறப்பம்சமாகும். இது அவருக்கு 35-வது ஹாட்ரிக் ஆகும். இதன் மூலம் லா லிகா கால்பந்து வரலாற்றில் அதிக ஹாட்ரிக் கோல் அடித்தவர் என்ற சாதனையை படைத்தார். இந்த சாதனை பட்டியலில் ரியல்மாட்ரிட் முன்னாள் வீரர் கிறிஸ்டியானா ரொனல்டோ 34 ஹாட்ரிக்குடன் அடுத்த இடத்தில் உள்ளார்.