கும்மிடிப்பூண்டி பஸ் நிலையம் அருகே நடைபெற்ற ஆர்ப்பாட்டத்தில் சி.ஐ.டி.யூ. மாநிலத்தலைவர் சவுந்தரராஜன் தலைமை தாங்கினார். அனைத்து தொழிலாளர் சங்க நிர்வாகிகள் முன்னிலை வகித்தனர். இதில் 125 பேரை கும்மிடிப்பூண்டி போலீசார் கைது செய்தனர்.

பள்ளிப்பட்டு, ஆர்.கே. பேட்டை பகுதிகளில் ஆர்பாட்டம் நடைப்பெற்றது. இதில் பங்கேற்ற 150 பேரை போலீசார் கைது செய்தனர்.

ஊத்துக்கோட்டை, மீஞ்சூர்

ஊத்துக்கோட்டை-பெரியபாளையம் பிரதான சாலையில் நடந்த சாலை மறியலில் மத்திய அரசுக்கு எதிராக கோஷங்கள் எழுப்பப்பட்டது. ஊத்துக்கோட்டை துணை போலீஸ் சூப்பிரண்டு சாரதி, சப் இன்ஸ்பெக்டர் செந்தில் முருகன் தலைமையிலான போலீசார் சாலை மறியலில் ஈடுபட்ட 147 பெண்கள் உள்பட 202 பேரை கைது செய்தனர். பின்னர் அவர்களை திருமண மண்டபத்தில் அடைத்து வைத்தனர்.

மீஞ்சூரில் நடத்த போராட்டத்தில் மீஞ்சூர் பஜாரில் இருந்து அஞ்சலகம் நோக்கி பேரணியாக தமிழ்நாடு தேசிய மின்சார தொழிலாளர் சம்மேளனத்தின் சார்பில் துணை பொது செயலாளர் தாமோதரன் தலைமையில் 58 பெண்கள் உள்பட 208 பேர் ஊர்வலமாக சென்றனர். அவர்களை தடுத்து நிறுத்தி போலீசார் கைது செய்தனர்.

திருத்தணி நகராட்சிக்கு எதிரே உள்ள மாநில நெடுந்சாலையில் எல்.பி.எப்., ஐ.என்.டி.யூ.சி., சி.ஐ.டி.யு., ஏ.ஐ.டி.யு.சி. உள்ளிட்ட பல்வேறு தொழிற்சங்கங்களை சேர்ந்த 200-க்கும் மேற்பட்டவர்கள் போராட்டத்தில் கலந்துக்கொண்டு மத்திய அரசு உடனடியாக 12 அம்ச கோரிக்கைகளை நிறைவேற்ற வேண்டும் என கோஷங்களை எழுப்பினர்.

இந்த போராட்டத்தில் கைது செய்யப்பட்ட அனைவரும் தனியார் திருமண மண்டபங்களில் தங்க வைக்கப்பட்டு மாலையில் விடுவிக்கப்பட்டனர்.