நேற்று நள்ளிரவு 1.30 மணிக்கு இளங்கோவனின் மகன் லோகேஷ் (19), இவருடைய நண்பரான காவேரிப்பட்டணத்தை சேர்ந்த சதீஷ் (19) ஆகியோர் புகழேந்தியின் வீட்டிற்கு வந்து கதவை தட்டினா. இந்த சத்தம் கேட்டு தூங்கி கொண்டிருந்த புகழேந்தி எழுந்து வீட்டின் கதவை திறந்து பார்த்தார்.

அப்போது லோகேசும், சதீசும் தாங்கள் மறைத்து வைத்திருந்த கத்தியால் சரமாரியாக புகழேந்தியை குத்தினர். இதில் படுகாயம் அடைந்த அவர் வலிதாங்க முடியாமல் அலறினார். இதைக்கேட்டு அவரது மனைவி பப்பிராணி (45) அங்கு ஓடி வந்தார். அவரையும் லோகேஷ், சதீஷ் ஆகியோர் கத்தியால் குத்தினார்கள். இதில் சம்பவ இடத்திலேயே 2 பேரும் துடிதுடித்து பரிதாபமாக இறந்தனர்.

2 பேருக்கு கத்திக்குத்து

இதற்கிடையே, சத்தம் கேட்டு பக்கத்து வீட்டில் வசித்து வந்த கரிகாலன், அவரது மனைவி சரஸ்வதி (42) ஆகியோர் அங்கு ஓடிவந்தனர். அந்த நேரம் கையில் கத்தியுடன் இருந்த லோகேசும், சதீசும் அவர்களையும் சரமாரியாக கத்தியால் குத்திவிட்டு அங்கிருந்து தப்பி ஓடினார்கள்.

இந்த நிலையில் அக்கம் பக்கத்தில் உள்ளவர்கள் அங்கு ஓடி வந்தனர். அவர்கள் புகழேந்தி, பப்பிராணி ஆகியோர் கொலையுண்டு கிடப்பதையும், கரிகாலன் சரஸ்வதி ஆகியோர் கத்திக்குத்தில் படுகாயம் அடைந்து கிடந்ததையும் கண்டு அதிர்ச்சி அடைந்தனர். அவர்கள் இதுகுறித்து உடனடியாக கிருஷ்ணகிரி டவுன் போலீசாருக்கு தகவல் தெரிவித்தனர்.

அதன் பேரில் சம்பவ இடத்திற்கு போலீசார் விரைந்து வந்தனர். அவர்கள் கொலையுண்ட புகழேந்தி, பப்பிராணி ஆகியோரின் உடல்களை மீட்டு பிரேத பரிசோதனைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். அதேபோல கத்திக்குத்தில் காயம் அடைந்த கரிகாலன், சரஸ்வதி ஆகிய 2 பேரையும் மீட்டு சிகிச்சைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர்.

2 பேர் சிக்கினர்

இதற்கிடையே கிருஷ்ணகிரியில் பெங்களூரு சாலையில் போலீசார் ரோந்து பணியில் ஈடுபட்டனர். அப்போது ரத்தக்கறை படிந்த உடையுடன் மோட்டார்சைக்கிளில் வந்த 2 பேரை பிடித்து விசாரித்தனர். அதில் அவர்கள் புகழேந்தி, பப்பிராணி ஆகியோரை கொலை செய்த லோகேஷ், சதீஷ் என தெரியவந்தது. இதையடுத்து போலீசார் அவர்கள் 2 பேரையும் கைது செய்தனர்.

கைதான லோகேஷ் தனியார் கல்லூரி ஒன்றில் இளநிலை பட்டப்படிப்பு 2-ம் ஆண்டு படித்து வருகிறார். சொத்து பிரச்சினைக்காக அவர் தனது 2 சித்தப்பா, 2 சித்திகளை கொலை செய்ய முயன்றதும், அதில் ஒரு சித்தப்பா, சித்தியை கொலை செய்ததும் விசாரணையில் தெரியவந்தது.

கொலை செய்யப்பட்ட புகழேந்திக்கு ஒரு மகள் உள்ளார். இவர் அச்சமங்கலத்தில் உள்ள சித்தியின் வீட்டில் தங்கி படித்து வருகிறார்.

பரபரப்பு

இந்த கொலை தொடர்பாக கிருஷ்ணகிரி டவுன் போலீசார் வழக்குப்பதிவு செய்து விசாரணை நடத்தி வருகிறார்கள். கிருஷ்ணகிரியில் சொத்து தகராறில், சித்தப்பா, சித்தியை கல்லூரி மாணவர் தனது நண்பருடன் சேர்ந்து குத்திக்கொலை செய்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.