அ.தி.மு.க. ஆட்சி அமைந்ததும் குடியிருப்பதற்கு சொந்தவீடு இல்லாதவர்களுக்கு, கிராமப்புறங்களில் அரசே இடம் வாங்கி கான்கிரீட் வீடுகள் கட்டித்தரப்படும். நகர் பகுதிகளில் அரசே இடம் வாங்கி அடுக்குமாடி வீடுகள் கட்டி அம்மா இல்லம் திட்டம் மூலமாக விலையில்லாமல் வழங்கப்படும்.

சமூகத்தில் பொருளாதார சமநிலையை உருவாக்கிட குல விளக்கு திட்டத்தின் மூலம் அனைத்து குடும்ப அட்டை தாரர்களுக்கும் ஒவ்வொரு மாதமும், உதவித்தொகையாக ரூ.1,500 வழங்கப்படும். இந்த தொகை குடும்பத்தலைவியின் வங்கி கணக்கிலும், ஆண்கள் மட்டுமே உள்ள குடும்பத்தில் உள்ள ஆண்களின் வங்கி கணக்கிலும் செலுத்தப்படும்.

நகர பஸ்களில் பயணம் செய்யும் மகளிருக்கு பஸ் கட்டணத்தில் 50 சதவீதம் கட்டண சலுகை வழங்கப்படும். பொது வினியோகத் திட்டத்தின் மூலம் அத்தியாவசிய ரேஷன் பொருட்கள் அனைத்தும் மக்களின் வீடுகளுக்கே நேரிடையாக சென்று வழங்கப்படும்.

விவசாயிகளின் உற்பத்தியை பெருக்கவும், அதற்கு விவசாயிகளை ஊக்குவிக்கும் வகையிலும் அவர்களுக்கு ஆண்டுக்கு ரூ.7,500 உழவு மானியம் வழங்கப்படும். அனைத்து அரிசி குடும்ப அட்டை தாரர்களுக்கும் விலையில்லா சூரியசக்தி சமையல் அடுப்பு வழங்கப்படும். பெண்களின் பணிச்சுமையை குறைக்கும் நோக்குடன் அரிசி குடும்ப அட்டைதாரர்களுக்கு அம்மா வாஷிங்மிஷின் வழங்கப்படும். மாணவர் மற்றும் பெற்றோர் நலன் காக்க கல்வி கடன் தள்ளுபடி செய்யப்படும். கல்லூரி மாணாக்கர்களுக்கு வழங்கப்பட்டு வரும் 2 ஜி.பி. டேட்டா ஆண்டு முழுவதும் வழங்கப்படும்.

உலகளவில் புகழ்பெற்ற ஹார்வேர்டு, ஆக்ஸ்போர்டு, ஏல், கேம்பிரிஜ், எம்.ஐ.டி. போன்ற பல்கலைக்கழகங்களுடன் இணைந்து 10 சர்வதேச தரம் வாய்ந்த பல்கலைக்கழகங்கள் தமிழ்நாட்டில் தொடங்கப்படும்.

அகஸ்தீஸ்வரம் தோவாளை பகுதியில் உள்ள உள்நாட்டு மீனவர்களின் கோரிக்கைக்கு இணங்க உள்நாட்டு மீனவர்கள் நல வாரியம் அமைக்கப்படும் அதன் மூலம் அவர்களுக்கு ஓய்வூதியம் உள்ளிட்ட சலுகைகளும் வழங்கப்படும். கன்னியாகுமரி அருகே உள்ள சின்னமுட்டம் மீன்பிடி துறைமுகம் விரிவுபடுத்தப்படும். மீனவர்கள் குறைவில்லாமல் தங்கள் மீன்பிடித் தொழிலை செய்வதற்கான தடைகள் அனைத்தும் நீக்கப்பட்டு மீன்பிடித் தொழில் செழிக்க வழிவகை செய்யப்படும்.

கன்னியாகுமரியில் இருந்து மீன்களை வெளிநாடுகளுக்கு ஏற்றுமதி செய்வதற்கான தொழில்நுட்ப பூங்கா அமைக்கப்படும். கன்னியாகுமரி தொகுதிக்கு உட்பட்ட கடற்கரை கிராமங்களில் மீனவர்களின் வாழ்வாதாரத்தை பெருக்குவதற்காக பல்வேறு வளர்ச்சி திட்டப் பணிகள் நிறைவேற்றப்படும். கன்னியாகுமரி பெரியநாயகி தெரு, கோவளம் ஆகிய பகுதிகளில் உடனடியாக தூண்டில் வளைவு அமைக்க நடவடிக்கை மேற்கொள்ளப்படும். தோவாளை ஒன்றிய பகுதியில் காட்டு பன்றிகளின் தொல்லையில் இருந்து விவசாய விளை நிலங்களை பாதுகாக்க முதல்- அமைச்சர் எடப்பாடி பழனிசாமி தலைமையிலான அ.தி.மு.க. அரசு நடவடிக்கை மேற்கொள்ளும். விவசாயிகள் மற்றும் மீனவர்களின் நலன் காக்கும் அரசாக முதல்-அமைச்சர் எடப்பாடி பழனிசாமி தலைமையிலான அ.தி.மு.க. அரசு செயல்பட்டுக் கொண்டிருக்கிறது. தமிழகத்தில் மீண்டும் 3-வது முறையாக அ.தி.மு.க. அரசு எடப்பாடி பழனிச்சாமி தலைமையில் தொடர நடைபெற இருக்கின்ற சட்டசபை தேர்தலில் கன்னியாகுமரி சட்டசபை தொகுதியில் அ.தி.மு.க. வேட்பாளராக போட்டியிடும் எனக்கு இரட்டை இலை சின்னத்தில் பெருவாரியாக வாக்களித்து வெற்றி பெற செய்ய வேண்டும். இவ்வாறு தளவாய்சுந்தரம் பேசினார்.

இந்த பிரசார நிகழ்ச்சியில் முன்னாள் எம்.எல்.ஏ. முத்துகிருஷ்ணன், தோவாளை வடக்கு ஒன்றிய செயலாளர் பொன். சுந்தர்நாத், பேரூர் செயலாளர் முத்துராஜ், கிளைச் செயலாளர் செல்வம் உள்பட பலர் கலந்து கொண்டனர்.