அந்தவகையில் நேற்று காலை 8 மணி வரையிலான 24 மணி நேரத்தில் 25 ஆயிரத்து 709 பேர் தொற்றை வென்று வீடு திரும்பியிருந்தனர். இவர்களையும் சேர்த்து இந்தியாவில் இதுவரை குணமடைந்தவர்கள் எண்ணிக்கை 96 லட்சத்து 6 ஆயிரத்து 111 என்ற அளவை எட்டியிருக்கிறது. இது மொத்த பாதிப்பில் 95.53 சதவீதம் ஆகும்.

அதிக எண்ணிக்கையிலான நோயாளிகள் தினமும் குணமடைந்து வீடு திரும்புவதால் ஆஸ்பத்திரிகளில் சிகிச்சையில் இருக்கும் கொரோனா நோயாளிகளின் எண்ணிக்கை கணிசமாக குறைந்து வருகிறது. நேற்று காலை நிலவரப்படி நாடு முழுவதும் 3 லட்சத்து 03 ஆயிரத்து 639 பேர் மட்டுமே சிகிச்சையில் இருந்தனர்.

இது நேற்று முன்தினத்தை விட 1,705 பேர் குறைவாகும். மொத்தத்தில் 3.02 சதவீத நோயாளிகளுக்கு மட்டுமே தற்போது சிகிச்சை அளிக்கப்பட்டு வருகிறது. இந்தியாவில் சிகிச்சை பெறுவோர் எண்ணிக்கை கடந்த 15 நாட்களாக 4 லட்சத்துக்கு குறைவாக நீடித்து வருவது குறிப்பிடத்தக்கது.

இதற்கிடையே நேற்று காலை 8 மணி வரையிலான 24 மணி நேரத்தில் மேலும் 24,337 பேர் தொற்றுக்கு ஆளாகி இருக்கின்றனர். இதனால் நாடு முழுவதும் இதுவரை கொரோனாவிடம் சிக்கியவர்களின் எண்ணிக்கை 1 கோடியே 55 ஆயிரத்து 560 ஆகியிருக்கிறது.

அதேநேரம் மேற்படி 24 மணி நேரத்தில் மேலும் 333 பேர் கொரோனாவால் மரணத்தை தழுவியிருக்கின்றனர். இதில் அதிகபட்சமாக 98 பேர் மராட்டியத்தை சேர்ந்தவர்கள் ஆவர். தொடர்ந்து மேற்கு வங்காளம், கேரளா மற்றும் டெல்லியில் முறையே 40, 30, மற்றும் 26 மரணங்கள் நிகழ்ந்துள்ளன.

இதனால் இதுவரை பலியான கொரோனா நோயாளிகளின் எண்ணிக்கை 1 லட்சத்து 45 ஆயிரத்து 810 ஆக உயர்ந்து விட்டது. இது 1.45 சதவீதம் ஆகும்.

நாடு முழுவதும் நேற்று முன்தினம் 9 லட்சத்து 134 சளி மாதிரிகள் பரிசோதிக்கப்பட்டு உள்ளன. இதன் மூலம் மொத்த பரிசோதனை எண்ணிக்கை 16 கோடியே 20 லட்சத்து 98 ஆயிரத்து 329 ஆக உயர்ந்திருக்கிறது.

இந்த தகவல்களை மத்திய சுகாதார அமைச்சகம் கூறியுள்ளது.