எனவே, இந்த பொதுநல வழக்கு விசாரணைக்கு உகந்தது அல்ல. மேலும், இந்த ஐகோர்ட்டு உத்தரவை சுட்டிக்காட்டி அமைதியான வழிகளில் போராட்டத்தில் ஈடுபடுபவர்களை போலீசார் மிரட்டுகின்றனர். அதேநேரம், குடியுரிமை திருத்த சட்டத்துக்கு எதிராக போராட்டம் நடத்துவோருக்குத்தான் போலீசார் நெருக்கடி கொடுக்கின்றனர். ஆதரவாக போராட்டம் நடத்துவோர் மீது நடவடிக்கை எடுப்பது இல்லை என்று வாதிட்டனர்.

அப்போது குறுக்கிட்ட நீதிபதிகள், எங்களது உத்தரவை முழுமையாக படித்து பார்த்தீர்களா? குடியுரிமை திருத்த சட்டத்துக்கு எதிராக தமிழகம் முழுவதும் போராட்டம் நடத்துவோர் மீது நடவடிக்கை எடுக்க உத்தரவிடவில்லை. திருப்பூரில் நடைபெறும் போராட்டம் தொடர்பாகத்தான் உத்தரவிட்டோம் என்று கூறினர்.

இதையடுத்து நீதிபதிகள் பிறப்பித்த உத்தரவில் கூறியிருப்பதாவது:-

மனுதாரர் பற்றிய விவரங்களை இந்த ஐகோர்ட்டுக்கு தெரிவிக்காதது துரதிருஷ்டவசமானது என்றும், இதனால் இந்த வழக்கை பொதுநல வழக்காக கருதக்கூடாது. அதன் மீது பிறப்பித்த உத்தரவை நிறுத்தி வைக்க வேண்டும் என்று வக்கீல்கள் வாதிட்டனர். அரசு தரப்பில் ஆஜரான மாநில அரசு பிளடர் வி.ஜெயபிரகாஷ் நாராயணன், இந்த ஐகோர்ட்டு பிறப்பித்த உத்தரவை நிறுத்தி வைத்தாலும், சட்டவிரோதமாக, உரிய அனுமதி பெறாமல், பொதுமக்களுக்கு இடையூறு ஏற்படும் விதமாக போராட்டங்களை நடத்துவோர் மீது போலீசார் சட்டப்படி நடவடிக்கை எடுக்க தடை எதுவும் இல்லை என்று வாதிட்டார்.

இருதரப்பு வாதங்களின் அடிப்படையில், திருப்பூரில் நடக்கும் போராட்டம் குறித்து கடந்த 5-ந் தேதி (நேற்று முன்தினம்) நாங்கள் பிறப்பித்த உத்தரவை நிறுத்திவைக்கிறோம். மேலும், போராட்டக்காரர்கள் தாங்கள் விரும்பும் இடத்தில், அனுமதியின்றி, பொதுமக்களுக்கு இடையூறாக போராட்டம் நடத்த முடியுமா? என்ற கேள்வியும் இந்த வழக்கில் எழுகிறது.

இதுகுறித்து விரிவான விசாரணை நடத்த வேண்டியது உள்ளது. எனவே, இந்த வழக்கை வருகிற 11-ந் தேதிக்கு தள்ளிவைக்கிறோம். மேலும், அனுமதியின்றி, சட்டவிரோதமாக போராட்டத்தில் ஈடுபடுவோர் மீது போலீசார் சட்டப்படி நடவடிக்கை எடுக்க தடை எதுவும் இல்லை. இவ்வாறு நீதிபதிகள் கூறியுள்ளனர்.