லண்டனில் ஊழல் பணத்தில் அவென்பீல்டு சொகுசு வீடுகள் வாங்கி குவித்த வழக்கில் பாகிஸ்தான் முன்னாள் பிரதமர் நவாஸ் ஷெரீப்புக்கு 10 ஆண்டு, அவரது மகள் மரியம் நவாசுக்கு 7 ஆண்டு, மருமகன் கேப்டன் சப்தாருக்கு 1 ஆண்டு சிறைத்தண்டனை விதித்து தேசிய பொறுப்புடைமை கோர்ட்டு கடந்த 6ந் தேதி தீர்ப்பு அளித்தது. கேப்டன் சப்தார் கைது செய்யப்பட்டு, ராவல்பிண்டி அடியலா சிறையில் அடைக்கப்பட்டார்.

இந்த நிலையில் புற்றுநோயால் அவதியுற்று, லண்டன் மருத்துவமனையில் கோமா நிலையில் உள்ள மனைவி குல்சூம் நவாசை பார்க்கச் சென்றிருந்த நவாஸ் ஷெரீப்பும், மகள் மரியமும் நேற்று இந்திய நேரப்படி இரவு 9.15 மணிக்கு அபுதாபி வழியாக லாகூர் அல்லமா இக்பால் விமான நிலையத்தில் வந்து இறங்கினர். அங்கு அவர்கள் கைது செய்யப்பட்டு சிறப்பு விமானத்தில் இஸ்லாமாபாத் அழைத்துச்செல்லப்பட்டனர். அங்கு இருந்து பலத்த பாதுகாப்புடன் இஸ்லாமாபாத் அடியலா சிறைக்கு கொண்டு செல்லப்பட்டு, அடைக்கப்பட்டனர். இரவை அவர்கள் சிறையில் கழித்தனர்.