புவனேஸ்வர்,
12-வது ஜூனியர் உலக கோப்பை ஆக்கி போட்டி (21 வயதுக்கு உட்பட்டோர்) ஒடிசா தலைநகர் புவனேஸ்வரில் நடந்து வருகிறது. இதில் இன்று (ஞாயிற்றுக்கிழமை) இரவு 7.30 மணிக்கு நடைபெறும் இறுதிப்போட்டியில் 6 முறை சாம்பியனான ஜெர்மனி, முன்னாள் சாம்பியனான அர்ஜென்டினாவுடன் மல்லுக்கட்டுகிறது.
லீக் ஆட்டத்தில் தோல்வியை சந்திக்காத ஜெர்மனி அணி, கால்இறுதியில் பெனால்டி ஷூட்டில் ஸ்பெயினையும், அரைஇறுதியில் நடப்பு சாம்பியன் இந்தியாவையும் வீழ்த்தி இறுதிப்போட்டிக்குள் நுழைந்தது. அர்ஜென்டினா லீக் ஆட்டத்தில் ஜெர்மனியிடம் (2-3) பணிந்து இருந்தது. அதற்கு பதிலடி கொடுத்து 2-வது முறையாக கோப்பையை வெல்ல போராடும். எனவே இந்த ஆட்டத்தில் விறுவிறுப்புக்கு பஞ்சமிருக்காது.
முன்னதாக மாலை 4.30 மணிக்கு நடைபெறும் 3-வது இடத்துக்கான ஆட்டத்தில் இந்திய அணி, பிரான்சுடன் மோதுகிறது. தொடக்க லீக் ஆட்டத்தில் பிரான்சிடம் (4-5) அதிர்ச்சி தோல்வி கண்டு இருந்த இந்திய அணி அதற்கு பழிதீர்க்குமா என்பதே ரசிகர்களின் எதிர்பார்ப்பாகும்.