பந்தலூர் தாலுகா கையுன்னி அருகே போத்துகுளி கொட்டைமேடு பகுதியை சேர்ந்தவர் பாஸ்கரன் (வயது 63). இவருடைய மனைவி சுலோச்சனா (58). இவர் நேற்று முன்தினம் இரவு சமையல் அறையில் கியாஸ் அடுப்பை பற்ற வைத்து, ஒரு பாத்திரத்தில் தண்ணீரை கொதிக்க வைத்தார். இதைத்தொடர்ந்து வீட்டை விட்டு வெளியே வந்த கணவன், மனைவி 2 பேரும் தங்களது கால்நடைகளுக்கு பசுந்தீவனம் வழங்கி கொண்டிருந்தனர். அப்போது வீட்டு சமையல் அறையில் திடீரென பயங்கர தீ பரவியது. இதை கண்ட பாஸ்கரன், அவரது மனைவி சுலோச்சனா ஆகியோர் தண்ணீரை ஊற்றியதோடு, மண்ணை வாரி வீசினர்.

அப்போது திடீரென கியாஸ் சிலிண்டர் பயங்கரமாக வெடித்து சிதறியது. இதில் சமையல் அறை இடிந்து விழுந்தது. மேலும் அதன் கூரையும் சரிந்தது. இந்த விபத்தில் பாஸ்கரன், சுலோச்சனா ஆகியோர் பலத்த காயம் அடைந்தனர். மேலும் வீட்டில் வைத்திருந்த பொருட்கள் அனைத்தும் சேதம் அடைந்தன.