சென்னை,
தங்கம், வெள்ளி விலை ‘கிடுகிடு'வென ஏறுவது, பின்னர் ‘மளமள'வென சரிவது என கண்ணாமூச்சி ஆட்டம் காட்டி வருகிறது. அந்த வகையில் தங்கம் விலை நேற்று முன்தினம் ஒரே நாளில் கிராமுக்கு ரூ.1,190-ம், சவரனுக்கு ரூ.9,520-ம் அதிகரித்து, ஒரு சவரன் ரூ.1,34,400 என்ற இதுவரை இல்லாத உச்சத்தை எட்டியது. வெள்ளி விலையும் நேற்று முன்தினம் ஒரே நாளில் கிராமுக்கு ரூ.25 உயர்ந்து, ரூ.425-க்கு விற்கப்பட்டது. இதுவும் வரலாறு காணாத உச்சமாக பார்க்கப்பட்டது.
நேற்று முன்தினம் அதிரடியாக ஏற்றம் கண்ட தங்கம், வெள்ளி விலை, நேற்று எந்த வேகத்தில் ஏறியதோ, அதே வேகத்தில் இறங்கியது. அதன்படி, தங்கம் விலை நேற்று கிராமுக்கு ரூ.950-ம், சவரனுக்கு ரூ.7,600-ம் சரிந்து, ஒரு கிராம் ரூ.15,850-க்கும், ஒரு சவரன் ரூ.1,26,800-க்கும் விற்பனையானது. வெள்ளி விலையும் கிராமுக்கு ரூ.20 குறைந்து, ஒரு கிராம் ரூ.405-க்கு விற்கப்பட்டது.
இந்த நிலையில் இன்று காலையில் தங்கம் மற்றும் வெள்ளி விலை மீண்டும் சரிந்தது. அதன்படி சென்னையில் 22 கேரட் ஆபரணத் தங்கத்தின் விலை கிராமுக்கு ரூ.950-ம், சவரனுக்கு ரூ.7,600-ம் சரிந்து, ஒரு கிராம் ரூ.14,900-க்கும், ஒரு சவரன் ரூ.1,19,200-க்கும் விற்பனையானது. வெள்ளி விலை கிராமுக்கு ரூ.55-ம், கிலோவுக்கு ரூ.55 ஆயிரமும் குறைந்து, ஒரு கிராம் ரூ.350-க்கும், ஒரு கிலோ ரூ.3,50,000-க்கும் விற்பனையானது.
இந்த நிலையில் இன்று ஒரே நாளில் வெள்ளி விலை 2-வது முறையாக குறைந்துள்ளது. அதன்படி சென்னையில் வெள்ளி விலை பிற்பகலில் கிராமுக்கு ரூ.30-ம், கிலோவுக்கு ரூ.30 ஆயிரமும் குறைந்து, ஒரு கிராம் ரூ.320-க்கும், ஒரு கிலோ ரூ.3,20,000-க்கும் விற்பனையாகி வருகிறது. இன்று ஒரே நாளில் வெள்ளி விலை கிலோவுக்கு ரூ.85 ஆயிரம் குறைந்துள்ளது குறிப்பிடத்தக்கது. தங்கம் விலையில் பிற்பகலில் மாற்றம் இல்லை.