சினிமா செய்திகள்

‘‘சம்பளம் கொடுக்காத படங்களுக்கு ஒத்துழைப்பு கொடுக்க வேண்டாம்’’ நடிகர் சங்கம் அறிக்கை + "||" + Actor association report

‘‘சம்பளம் கொடுக்காத படங்களுக்கு ஒத்துழைப்பு கொடுக்க வேண்டாம்’’ நடிகர் சங்கம் அறிக்கை

‘‘சம்பளம் கொடுக்காத படங்களுக்கு ஒத்துழைப்பு கொடுக்க வேண்டாம்’’
நடிகர் சங்கம் அறிக்கை
நடிகர்–நடிகைகள், சம்பளம் கொடுக்காத பட நிறுவனங்களுக்கு ஒத்துழைப்பு கொடுக்க வேண்டாம் என்று நடிகர் சங்கம் வேண்டுகோள் விடுத்துள்ளது.
தென்னிந்திய நடிகர் சங்கம் நேற்று ஒரு அறிக்கை வெளியிட்டது. அதில் கூறியிருப்பதாவது:–

‘‘மெட்ராஸ் எண்டர்பிரைசஸ்’’ தயாரிப்பான ‘‘துப்பறிவாளன்’’ என்ற திரைப்படத்தில் சங்க உறுப்பினர்கள் விஷால் நடித்தமைக்காகவும், ‘‘வீரசிவாஜி’’ என்ற திரைப்படத்தில் விக்ரம்பிரபு நடித்தமைக்காகவும் ஊதிய பாக்கி வழங்கப்படாமல் உள்ளது. மேலும் ‘‘96’’ என்ற திரைப்படத்தில் நடித்த சங்க உறுப்பினர் விஜய்சேதுபதி ஊதிய பாக்கி பெற்றுக்கொள்ளாமலேயே திரைப்படம் திரையிடப்பட்டது. 

மேற்கண்ட திரைப்படங்கள் திரையிடும் கடைசி நேரத்தில் நடிகர்களின் சூழ்நிலையை இந்த தயாரிப்பு நிறுவனம் தனக்கு சாதகமாக பயன்படுத்திக்கொண்டு தொடர்ந்து ஊதியம் வழங்காமல் படங்களை திரையிட்டுள்ளது.

படம் வெளியீட்டின் போது இக்கட்டான சூழ்நிலையில், நடிகர்கள் தங்கள் வருமானத்தை விட்டுக்கொடுத்தே தயாரிப்பாளர்களுக்கு உதவி வருகிறார்கள். ஆனால் அந்த நற்செயலை பலவீனமாக எடுத்துக்கொண்டு சில தயாரிப்பாளர்கள் நடிகர்களை நிர்ப்பந்தப்படுத்துவது அல்லது பரஸ்பரம் ஒத்துக்கொண்ட சம்பளத்தை தர மறுப்பது என்பதை வழக்கமாக்கி கொண்டது. 

கடந்த காலங்களிலிருந்தே பல தயாரிப்பாளர்கள் நடிகர்களுக்கு இதுபோன்ற நிகழ்வுகள் தொடர்ந்து நடந்து வருகிறது. இதை முடிவுக்கு கொண்டு வரும் நிலையில் இதுகுறித்து நடிகர் சங்க நிர்வாகக்குழு கலந்து ஆலோசித்தது. 

அதன் அடிப்படையில் இனிவரும் காலங்களில் இதுபோன்று செயல்படும் எந்த ஒரு தயாரிப்பு நிறுவனத்துக்கும், தயாரிப்பாளருக்கும் தென்னிந்திய நடிகர் சங்கம் சார்ந்த உறுப்பினர்கள் (நடிகர்கள்–நடிகைகள்) எந்த ஒரு நிகழ்விற்கும், திரைப்படங்களுக்கும் ஒத்துழைப்பு வழங்கவேண்டாம் என முடிவெடுக்கப்பட்டது. 

அதன் அடிப்படையில் தற்போது மெட்ராஸ் எண்டர்பிரைசஸ் தயாரிப்பு நிறுவனம் சம்பந்தமான எந்த ஒரு நிகழ்விற்கும், திரைப்படங்களுக்கும் சங்க உறுப்பினர்கள் ஒத்துழைப்பு வழங்கவேண்டாம் என தென்னிந்திய நடிகர் சங்கம் கேட்டுக்கொள்கிறது.’’

இவ்வாறு அந்த அறிக்கையில் கூறப்பட்டு இருக்கிறது.