உலக கோப்பை கிரிக்கெட் படத்தில் ஸ்ரீகாந்த் வேடத்தில் நடிக்கும் ஜீவா

இந்த படத்துக்கு ‘83’ என்று தலைப்பு வைத்துள்ளனர். கபீர்கான் இயக்குகிறார். உலக கோப்பையை வென்ற அணியில் இடம்பெற்ற கிரிக்கெட் வீரர்கள் கதாபாத்திரத்திரங்களுக்கு நடிகர்கள் தேர்வு நடக்கிறது. கபில்தேவ் கதாபாத்திரத்தில் ரன்வீர் சிங் நடிக்கிறார். தமிழக வீரர் ஸ்ரீகாந்த் வேடத்தில் நடிக்க ஜீவா தேர்வாகி உள்ளார்.

இதுகுறித்து ஜீவா கூறியதாவது:-

“இந்திய கிரிக்கெட் அணி 1983-ல் உலக கோப்பையை வென்றதை மையமாக வைத்து தயாராகும் ‘83’ என்ற படத்தில் ஸ்ரீகாந்த் வேடத்தில் நான் நடிக்கிறேன். இந்த படம் மூலம் முதன் முதலாக நான் இந்திக்கு செல்கிறேன். பிரமாண்டமான முறையில் இந்த படம் தயாராகிறது. எனக்கு ஏற்கனவே கிரிக்கெட்டில் ஆர்வம் உண்டு. பல போட்டிகளில் பங்கேற்று கிரிக்கெட் ஆடி இருக்கிறேன்.

எனவே கிரிக்கெட் தொடர்பான ‘83’ படத்தின் படப்பிடிப்பை ஆர்வத்தோடு எதிர்பார்த்து காத்திருக்கிறேன். லகான், எம்.எஸ்.தோனி படங்கள் வரிசையில் ‘1983 உலக கோப்பை’ படமும் வரவேற்பை பெறும்.” இவ்வாறு ஜீவா கூறினார்.