புதிய அரசில் பதவி ஏற்ற, மந்திரிகளுக்கு இலாகா ஒதுக்கீடு சிவசேனாவுக்கு உள்துறை; தேசியவாத காங்கிரசுக்கு நிதி

மும்பை,

மராட்டியத்தில் பல்வேறு அரசியல் குழப்பங்களுக்கு மத்தியில் சிவசேனா, தேசியவாத காங்கிரஸ், காங்கிரஸ் கட்சிகள் தேர்தலுக்கு பிந்தைய கூட்டணி வைத்து ஆட்சி அமைத்தன.

சிவசேனா தலைவர் உத்தவ் தாக்கரே தலைமையில் கடந்த 28-ந் தேதி புதிய அரசு பதவி ஏற்றது.

அப்போது அவருடன் 3 கட்சிகளை சேர்ந்த தலா 2 மந்திரிகளும் பதவி ஏற்றனர். பதவி ஏற்று 2 வாரங்களை கடந்த போதிலும் மந்திரிகளுக்கு இலாகா ஒதுக்கீடு செய்யப்படாததால் அவர்கள் இலாகா இல்லா மந்திரிகளாக பதவி வகித்து வந்தனர். முக்கிய இலாகாக்களை கைப்பற்றுவதில் 3 கட்சிகளுக்கு இடையே ஏற்பட்ட போட்டியே, இழுபறிக்கு காரணம் என்று கூறப்பட்டது.

இந்த நிலையில் பதவி ஏற்ற மந்திரிகள் அனைவருக்கும் நேற்று இலாகாக்கள் ஒதுக்கீடு செய்யப்பட்டன. இதில் முக்கிய இலாகாவாக கருதப்படும் சட்டம்-ஒழுங்கை பராமரிக்கும் உள்துறையை சிவசேனா தன் வசப்படுத்தி கொண்டு உள்ளது. மற்றொரு முக்கிய இலாகாவான நிதித்துறை தேசியவாத காங்கிரசுக்கும், வருவாய், பொதுப்பணித்துறை காங்கிரசுக்கும் ஒதுக்கப்பட்டு உள்ளது.

மந்திரிகளுக்கு ஒதுக்கப்பட்டு உள்ள இலாகாக்கள் விவரம் வருமாறு:-

ஏக்நாத் ஷிண்டே: உள்துறை, நகர வளர்ச்சி, வனம், சுற்றுச்சூழல், குடிநீர் சப்ளை, நீர் பாதுகாப்பு, சுற்றுலா, பொதுநிறுவனங்கள், சட்டமன்ற விவகாரம்.

சுபாஷ் தேசாய்:- தொழில்கள், உயர் மற்றும் தொழில்நுட்ப கல்வி, விளையாட்டு மற்றும் இளைஞர் நலன், தோட்டக்கலை, போக்குவரத்து, மராத்தி மொழி மற்றும் கலாசாரம், துறைமுகம்.

ஜெயந்த் பாட்டீல்:- நிதி, வீட்டுவசதி, பொது சுகாதாரம், கூட்டுறவு, உணவு வினியோகம், தொழிலாளர் மற்றும் சிறுபான்மையினர் நலம்.

சகன் புஜ்பால்:- நீர்ப்பாசனம், கிராம வளர்ச்சி, சமூக நீதி, கலால், திறன் மேம்பாடு, உணவு மற்றும் மருந்து நிர்வாகம்.

பாலசாகேப் தோரட்:- வருவாய், மின்சாரம், மருத்துவ கல்வி, பள்ளிக்கல்வி, கால்நடை, பால் வளம், மீன்வளம்.

நிதின் ராவத்:- பொதுப்பணி, பழங்குடியினர் நலம், பெண்கள் மற்றும் குழந்தைகள் நலம், ஜவுளி, நிவாரணம் மற்றும் மறுவாழ்வு, இதர பிற்படுத்தப்பட்டோர், வி.ஜே.என்.டி., சிறப்பு பிற்படுத்தப்பட்டோர் நலம்.

மந்திரிகளுக்கு ஒதுக்கப்படாத மற்ற அனைத்து இலாகாக்களையும் முதல்-மந்திரி உத்தவ் தாக்கரே கவனிப்பார்.

இந்த இலாகா ஒதுக்கீட்டை முதல்-மந்திரி பரிந்துரையின் பேரில் கவர்னர் பகத்சிங் கோஷ்யாரி செய்துள்ளார்.

மந்திரி சபை விரிவாக்கம் சட்டமன்ற குளிர்கால கூட்டத்தொடருக்கு பிறகு செய்யப்படும் என எதிர்பார்க்கப்படுகிறது. இந்த கூட்டத் தொடர் வருகிற 16-ந் தேதி தொடங்கி, 21-ந் தேதி வரை நாக்பூரில் நடக்கிறது.