பகல் 10 மணிக்கு மேல் சுற்றித்திரிந்த 105 வாகனங்கள் பறிமுதல்-போலீஸ் சூப்பிரண்டு ராஜராஜன் நடவடிக்கை

கொரோனா பரவலின் தாக்கம் அதிகரித்து வரும் நிலையில் தமிழகத்தில் கடந்த 10-ந்தேதி முதல் 24-ந்தேதி வரை ஊரடங்கு பிறப்பிக்கப்பட்டு உள்ளது. இந்நிலையில் ஊரடங்கை பொதுமக்கள் முறையாக பின்பற்றவில்லை என முதல்-அமைச்சர் மு.க.ஸ்டாலின் தலைமையில் நடந்த அனைத்து கட்சி கூட்டத்தில் கருத்து தெரிவிக்கப்பட்டு ஊரடங்கை தீவிரப்படுத்த முடிவு செய்யப்பட்டது.
சிவகங்கை மாவட்டத்தை பொறுத்தவரை போலீஸ் சூப்பிரண்டு ராஜராஜன் உத்தரவின் பேரில் மாவட்டம் முழுவதும் போலீசார் நேற்று முன்தினம் தீவிர வாகன சோதனையில் ஈடுபட்டனர். சோதனையின்போது தேவையின்றி சுற்றித்திரிபவர்களுக்கு அபராதம் விதித்தும், மீண்டும் வெளியில் சுற்றித்திரிந்தால் வாகனம் பறிமுதல் செய்யப்படும் என்றும் எச்சரித்து அனுப்பினர்.
இதன்படி சிவகங்கை போலீஸ் சப்-டிவிசன் பகுதியில் 27 இருசக்கர வாகனங்கள் பறிமுதல் செய்யப்பட்டன. மேலும் காரைக்குடி சப்-டிவிசன் பகுதியில் ஒருகார் உள்பட 22 இருசக்கரவாகனங்கள் பறிமுதல் செய்யபட்டன.
திருப்பத்தூர் போலீஸ் சப்-டிவிசன் பகுதியில் 27 இருசக்கர வாகனங்கள் பறிமுதல் செய்யப்பட்டன. தேவகோட்டை போலீஸ் சப்-டிவிசன் பகுதியில் 18 இருசக்கர வாகனங்கள் பறிமுதல் செய்யப்பட்டன. மானாமதுரை போலீஸ் சப்-டிவிசன் பகுதியில் 11 இருசக்கர வாகனங்கள் பறிமுதல் செய்யப்பட்டன.மாவட்டம் முழுவதும் 105 இருசக்கர வாகனங்களை போலீசார் பறிமுதல் செய்தனர்.