பெண்ணாடத்தில் துணிகரம் ஓய்வுபெற்ற சர்வேயர் வீட்டில் ரூ.5 லட்சம் நகை கொள்ளை மர்மநபர்களுக்கு போலீஸ் வலைவீச்சு

பெண்ணாடம், 

பெண்ணாடம் வள்ளியம்மை நகரை சேர்ந்தவர் ஆறுமுகம்(வயது 63), ஓய்வு பெற்ற சர்வேயர். இவருக்கு கடந்த சிலநாட்களுக்கு முன்பு உடல்நலம் பாதிக்கப்பட்டது. இதையடுத்து அவர் சென்னையில் உள்ள ஒரு தனியார் ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார். இந்த நிலையில் கடந்த 11-ந்தேதி ஆறுமுகம் மகன் வினோத்குமார் வீட்டை பூட்டி விட்டு தனது மனைவி ரம்யாவை தாய் வீடான அரியலூர் மாவட்டம் முள்ளுக்குறிச்சியில் கொண்டு விட்டு விட்டு, தந்தையை பார்க்க சென்னை சென்றார்.

இந்த நிலையில் நேற்று அதிகாலை ஆறுமுகத்தின் வீட்டின் முன்பக்க கதவு உடைக்கப்பட்டு கிடந்தது. இதைபார்த்து அதிர்ச்சியடைந்த அக்கம் பக்கத்தினர் இதுபற்றி ரம்யாவுக்கும் மற்றும் பெண்ணாடம் போலீசாருக்கும் தகவல் தெரிவித்தனர். அதன்பேரில் சப்-இன்ஸ்பெக்டர் கோபிநாத் தலைமையிலான போலீசார் மற்றும் ரம்யா ஆகியோர் சம்பவ இடத்துக்கு விரைந்து வந்து பார்த்தபோது, பீரோவில் வைக்கப்பட்டிருந்த 14 பவுன் நகைகள், 120 கிராம் வெள்ளி பொருட்களை காணவில்லை. வினோத்குமார், ரம்யா தம்பதியினர் வீட்டை பூட்டிவிட்டு வெளியூர் சென்றதை நோட்டமிட்ட மர்மநபர்கள் நேற்று முன்தினம் நள்ளிரவில் வீட்டின் முன்பக்க கதவை உடைத்து உள்ளே புகுந்து, பீரோவில் இருந்த ரூ.5 லட்சம் மதிப்புள்ள நகை, வெள்ளி பொருட்களை கொள்ளையடித்துச் சென்றிருப்பது தெரியவந்தது. இதற்கிடையே கைரேகை நிபுணர்கள் கொள்ளை நடந்த வீட்டில் பதிவான மர்மநபர்களின் ரேகைகளை சேகரித்துச் சென்றனர்.

மேலும் இந்த சம்பவம் குறித்த புகாரின்பேரில் போலீசார் வழக்குப்பதிவு செய்து நகைகளை கொள்ளையடித்துச் சென்ற மர்மநபர்களை வலைவீசி தேடி வருகிறார்கள். இந்த கொள்ளை சம்பவத்தால் அச்சமடைந்த அப்பகுதி மக்கள் இரவு நேரங்களில் போலீசார் தீவிர ரோந்துப்பணியில் ஈடுபடவேண்டும் என காவல்துறைக்கு கோரிக்கை வைத்துள்ளனர்.